Adel Britaniyaning eng yosh badavlat xonandasiga aylandi

The Sunday Times nashri har yili turli sohalarda faoliyat olib boruvchi eng badavlat britaniyaliklar ro‘yxatini chop etadi. Gazetaning shu kunlarda chop etiluvchi sonida ham 2016 yilning eng badavlat irland va britaniyalik musiqachilari reytingi tuzib chiqildi. Ro‘yxat boshidagi ismlar bir necha yillardan beri o‘zgarmay kelmoqda, biroq daromadlarning ko‘rsatkichi sezilarli darajada farq qilishini ko‘rish mumkin.

Xonanda Adel 30 yoshgacha bo‘lgan musiqachilar orasida 2012 yildan beri yetakchilikni qo‘lda boy bermay kelmoqda. U yosh qo‘shiqchilar ichida “Britaniyaning eng badavlat xonandasi”, deya e'tirof etildi.

Hozirda Adelning moliyaviy ahvoli 85 million yevroni tashkil etadi va bu o‘tgan yilgi ko‘rsatgichga nisbatan 35 millionga ko‘proq.

Uning deyarli barcha albomlari nafaqat Britaniyada, balki AQSh va boshqa mamlakatlarda ham xit darajasiga yetdi. 2015 yilda sotuvga chiqqan “24” nomli albomi ham eng ko‘p sotilgan albom sifatida rekord o‘rnatdi.

Agarda The Sunday Times alohida xonandalarning emas, balki butun jamoa daromadlarini hisobga olganida birinchi o‘rinni “One Direction” egallagan bo‘lar edi. Hozirda guruhning moliyaviy ahvoli 132 million yevroni tashkil etadi. Biroq xonanda yigitlarning alohida daromadlari – 33 million yevro bo‘lib, bu esa o‘tgan yilga nisbatan 8 millionga ortgan.

Yoshi ulug‘lar daromadi

Biroq yosh san'atkorlarning daromadlari uzoq yillardan beri sahnada ijod qilib kelayotgan san'atkorlarnikiga yeta olmaydi. Agar yoshlarni hisobga olmay, umumiy reytingni ko‘radigan bo‘lsak, Adel 30-o‘rinni egallagan. Shuningdek, u reytingdagi eng badavlat ayol xonanda maqomida ham birinchilardan emas. Ro‘yxatda undan avval 91 million yevro daromadi bilan irlandiyalik xonanda va qo‘shiqlar muallifi Eniya turibdi.

Eniya odatda, omma oldida juda ham kam chiqish qiladi. Biroq u ijro etgan taronalar va saundreklar xonandaning badavlat insonlar safiga kirishiga sababchi bo‘lmoqda.

Pol Makkartni hamon reytingning “oltin” cho‘qqisini zabt etmoqda

Umumiy reyting hisobi bo‘yicha uzoq yillardan beri “The Beatles” guruhining sobiq a'zosi Pol Makkartni eng badavlat inson sifatida birinchi o‘rinni egalladi. Xonanda “buyuk to‘rtlik”ning merosini avaylagan holda, yangi albomlar chiqarib, ijod etishda davom etmoqda. U 74 yoshni qarshilagan bo‘lishiga qaramay, dunyo bo‘ylab gastrol safarlarini ham o‘tkazmoqda.

Hozirda Makkartni va uning rafiqasi Nensi Shevellning moliyaviy holati 760 million yevrodan iborat.

Umumiy hisobda ikkinchi pog‘onani mashhur myuzikllar muallifi, bastakor Endryu Lloyd Uebber zabt etdi. Shuningdek, yana bir sahna fidoyisi Elton Jon o‘zining 280 million yevro daromadi bilan ro‘yxatning to‘rtinchi o‘rnini egalladi.