Zidan: Ba'zida Ronalduni oldinroq almashtirmaganimdan afsuslanaman

Madridning «Real» klubi bosh murabbiyi Zinedin Zidan Ispaniya chempionati 34-tur doirasidagi «Vilyarreal»ga qarshi uchrashuvdagi yirik hisobdagi (3:0) g‘alabadan keyin Krishtianu Ronalduning jarohati borasida o‘z fikrlarini bildirib o‘tdi.

«Ronaldu juda katta hajmdagi ishni bajaradi, jamoa uchun ishlaydi — buni hamma tan oladi. U nafaqat gollar uradi, balki himoyaga qaytib to‘pni qaytarib olishda ham ishtirok etadi. Biz bugun himoyadan hujumga juda yaxshi chiqib keta oladigan jamoaga qarshi o‘ynadik, ammo ularga bugun hech qanday imkoniyat qoldirmadik.

Ba'zida Ronalduni oldinroq almashtirmaganimdan afsuslanaman. Vaqt o‘tgan sari bunga zarurat ko‘paymoqda. Ammo u maydonda doim bo‘lishni istaydigan va butun borini tashlab o‘ynaydigan futbolchi», — deya ta'kidladi Zidan.

Eslatib o‘tamiz, kecha bo‘lib o‘tgan uchrashuvning so‘nggi daqiqalarida Ronaldu son mushaklaridan olgan jarohati sabab maydonni erta tark etishga majbur bo‘lgandi.