Toshkent shahrining Mirobod tumanidagi eng yomon yo‘llardan biri ta'mirdan chiqarildi. Bir necha kun avval, Mehrjon ko‘chasi bo‘ylab o‘tuvchi tramvay yo‘li demontaj qilingan bo‘lsa, kuni kecha uni asfaltlash ishlari yakunlandi.
Mehrjon ko‘chasi nafaqat tramvay yo‘llari, balki deyarli har qadamda uchraydigan o‘ra va chuqurliklari bilan ham haydovchilar orasida mashhur. Yog‘ingarchilik vaqtidagi ahvoli yanada achinarli bo‘lar, avtomobillar go‘yoki ko‘lda suzishga majbur bo‘lishardi.
Bugungi kunda yo‘l yangicha ko‘rinishga ega bo‘ldi. Asfalt qatnov qismiga mohirona yotqizilgan. Ishchilarning so‘zlariga ko‘ra, tez kunlarda yo‘l chiziqlari chiziladi, o‘rtasiga temir to‘siq o‘rnatiladi.
