Soxta tekshiruvchilar ortidan kelgan pullar “metodist”ga yuqmadi...

Sanobar Nodirova ko‘p yillardan buyon Jomboy tuman xalq ta'lim muassasalarini metodik ta'minlash va tashkil etish bo‘limi maktabgacha ta'lim metodisti vazifasida ishlab kelayotgan edi. Bir kuni u 25-maktabgacha ta'lim muassasasi mudirasi Malika Normurodovaga qo‘ng‘iroq  qilib, yuqoridan tekshiruvchilar kelgani, harajatlar ko‘payib ketgani, shuning uchun 150 ming so‘m bermasa bo‘lmasligini aytdi. Bu haqda “Huquq” nashri yozmoqda. 

Malika Sanobarga buncha pul topolmasligini aytib,  uni insofga chaqirmoqchi bo‘ldi. Ammo Sanobar uni eshitishni ham istamadi. Ertasiga Malika Sanobarni xonasidan topolmagach, unga qo‘ng‘iroq qilib, 100 ming so‘m olib kelganligini aytdi. Pulni to‘liq olib kelmaganligidan jahli chiqqan Sanobar Malikaga pulni kotibaga tashlab ketishini tayinladi. 

Oradan ancha vaqt o‘tib, Sanobar Malikani yana xonasiga chaqirdi. Bu gal u gapni salobat bilan boshlab, tekshiruvchilar kelganligini, xarajat kattaligi va yordam qilmasa bo‘lmasligini aytib, daftariga bir nimalarni yozib hisob-kitob qila boshladi. Uning yana pul so‘rayotganidan jahli chiqqan Malika, avvaliga Sanobarning gaplari nima bilan tugashini kutib, sabr bilan eshitdi. “Mana, hisoblab chiqdim”, dedi Sanobar xonadagi jimlikni buzib va Malikaga 300 ming so‘m berishi kerakligini aytdi. 

Malika jahldan qizardi, ammo indamadi. Pulni olib kelishga va'da berib, xonadan chiqib ketdi. Uch kun davomida Sanobar unga pulni olib kelishi kerakligini eslatib turdi. Obdon o‘ylab, bir qarorga kelgan Malika Sanobarning oldiga keldi va pulni olib kelib berolmasligini qat'iy ohangda aytdi. 

Sanobar Malikaning qo‘liga qog‘oz-qalam tutib, ishdan bo‘shash haqida ariza yozishga majbur qildi. “Ishlayman, desangiz tartib shu. Bo‘lmasa joyni bo‘shatib qo‘ying, joyingizga ko‘z tikkanlar ko‘p”, dedi Sanobar. 
Malika ham haqini birovga berib qo‘yadiganlardan emas edi. U darhol bu haqda huquqni muhofaza qiluvchi organlarga ariza bilan murojaat qildi. Ertasiga Sanobar Malikadan aytilgan 300 ming so‘mdan 200 ming so‘mini olayotgan paytda ashyoviy dalil sifatida qo‘lga olindi. 

Sud hukmi bilan Sanobar Nodirovga birinchi bor sudlanayotgani, qilgan jinoyatidan chin ko‘ngildan pushaymonligi va boshqa yengillashtiruvchi holatlar inobatga olinib, jazo tayinlandi.