Yaponiyada G7 sammiti boshlandi

Yaponiya bosh vaziri Shindzo Abe Xonsyu orolidagi Mie prefekturasida joylashgan Ise ibodatxonasiga kelgan G7 davlatlari rahbarlarini kutib oldi va sammit o‘z ishini boshladi.

Yaponiya 2008 yildan buyon ilk marta "Katta yettilik" sammitiga mezbonlik qilmoqda. 2008 yilgi sammit Xokkaydo orolida o‘tkazilgandi. Bu yilgi sammit 26-27 may kunlari o‘tkaziladi.

Sammitga AQSh, Kanada, Germaniya, Buyuk Britaniya, Italiya va Fransiya rahbarlari yetib kelishdi va Kashikodjima orolchasidagi mehmonxonaga yo‘l olishdi.

Yopiq tarzda o‘tkaziladigan muzokaralarda sammit ishtirokchilari terrorchilik va kiberjinoyatchilik, global iqtisodiyot masalalari, Xitoy ta'sir doirasining tobora ortib borayotgani, Ukraina, Yaqin Sharq atrofidagi voqealar, qochqinlar muammosi, iqlim o‘zgarishi hamda Shimoliy Koreya atrfidagi yadroviy masalalarni muhokama qilishlari kutilmoqda.

Sammit yakunlariga bag‘ishlangan deklaratsiya 27 may kuni e'lon qilinadi.

Ma'lumotlarga ko‘ra, Obama tashrifi davomida Xirosima shahrini ziyorat qiladi. “Bu tarixiy voqea bo‘lishi kutilmoqda. Obama — 1945 yildagi atom bombardimonidan so‘ng Xirosimaga tashrif buyurgan birinchi Amerika prezidentiga aylanishi mumkin”, deb yozadi NHK nashri.

Bundan avvalroq Obama 200 mingga yaqin kishining yostig‘ini quritgan Xirosima va Nagasaki fojialari uchun kechirim so‘ramaydigan bo‘lgani haqida xabarlar berilgandi.

Ammo, shu bilan birga Yaponiya hukumati uchun atom bombasi qurboniga aylangan shaharlarning biriga Amerika prezidentining tashrif buyurishi katta voqelikligi ta'kidlanmoqda.