Yaponiyada ikkita qovun 27 ming dollarga sotildi

Yaponiyada 26 may kuni "yubari" navidagi ikkita qovun tarixda misli ko‘rilmagan narx – 3 mln yyenga (27 ming dollardan ko‘proqqa) sotildi. Qovun Xokkaydo orolining ma'muriy markazi – Sapporo shahri markaziy bozoridagi auksionda sotildi. Avvalgi rekord natija 2008 yilda o‘rnatilgan va 2,8 mln yyenni (joriy kurs bo‘yicha 22,7 ming dollar) tashkil qilgan.

Rekordchi qovunlarni Xonsyu orolidagi Amagasaki shahrida joylashgan supermarket egasi sotib oldi. U qovunlar bilan avval o‘z do‘koni peshoynasini bezamoqchi, so‘ngra ularni internet-auksionda sotmoqchi.

Yaponiyada qimmatbaho navdagi meva va sabzavotlar savdolari tez-tez o‘tkazilib turiladi. O‘tgan yili Miyadzaki prefekturasida yetishtirilgan ikki juft mango mevasi 2,5 ming dollarga sotilgandi. Bunday katta pullarni odatda o‘z do‘konlarining salobatli ekanini reklama qilish maqsadida bu mevalar bilan ularni bezovchi do‘kon egalari to‘laydilar.

"Yubari" navidagi qovunlar dumaloq shaklga ega bo‘lib, u nozik ta'm va o‘ziga xos shirin hidga ega olovrang eti sababli qadrlanadi.

Qovunning vatani Xokkaydo orolidagi Yubari shahri bo‘lib, u Yaponiyaning "qovunlar poytaxti" hisoblanadi. Vaholanki, bu yerda yarim asr avval faqatgina ko‘mir konlari bo‘lgan va mahalliy erkaklarning deyarli barchasi shu konlarda ishlagan. Tog‘-kon sanoati keyinroq daromadliligini yo‘qotib, konlar yopilgan. O‘shanda Yubari munitsipaliteti deyarli kasodga uchragan, biroq hududni sayyohlarni jalb etish ommaviy markaziga aylantirib, muammolar girdobidan chiqib ketishga muvaffaq bo‘lgan. Bunda mahalliy qovunlar ham o‘ziga xos o‘rin tutgan.