“Andijon polkasi”siga yoshlar o‘ynaganda

“Andijon polkasi” mazkur kuyning muallifi - andijonlik Orif garmon nomi bilan elga tanilgan bastakor Orif Toshmatovdir. Jahonning ne-ne sahnalarida ijro etilib olqish olayotgan raqsimizga katta e'tibor berilayotgani esa tahsinga loyiq.

Andijon viloyati hokimligi, madaniyat va sport ishlari boshqarmasi hamda «Kamolot» YoIH bu o‘lmas kuy va raqs umrini uzaytirish, yoshlarni milliy qadriyatlarga sodiq tarbiyalash maqsadida «Yoshlar o‘ynaganda» deb nomlangan ko‘rik-tanlov o‘tkazib, hayrli ishni boshlab berdi. Oliy o‘quv yurtlari, litsey, kollejlar va maktablarda tanlovning birinchi bosqichlari o‘tkazilib, g‘oliblar asosiy bellashuvga yig‘ildilar.

Z. M. Bobur nomidagi viloyat musiqali drama va komediya teatrida tanlovning asosiy bellashuvi bo‘lib o‘tdi.

Natijalarga ko‘ra, Andijon davlat universiteti «Eng yaxshi jamoa», Andijon qishloq xo‘jaligi instituti jamoasi «Eng yaxshi yigitlar raqsi», xalq ta'limi boshqarmasi dastasi «Eng yaxshi qizlar raqsi» nominatsiyalariga loyiq topildilar. Shuningdek, tanlovda «Eng yosh ishtirokchi», «Eng yaxshi baletmeyster», «Eng yaxshi liboslar» kabi nominatsiyalar g‘oliblari ham aniqlanib, viloyat hokimining faxriy yorlig‘i hamda esdalik sovg‘alari bilan taqdirlandilar.

Tanlov so‘nggida viloyat hokimining birinchi o‘rinbosari Muhammadjon Nishonov so‘zga chiqib, tanlov ishtirokchilarini qutladi.

Tadbir ishtirokchilari «Andijon polkasi» kuyini yaratgan san'atkor, O‘zbekiston Xalq artisti Orif Toshmatov qabrini ziyorat qildilar.

Elmurod ERMATOV, Andijon