Eng samarador smartfonlar o‘ntaligi

Eng mashhur «Antutu» benchmarki saytida 2016 yilning may oyiga ko‘ra eng samarador smartfonlar ro‘yxati havola etildi.

Natijalar ko‘pchilikni ajablantirishi mumkin, biroq umumiy olganda ular kutilganidek -  yetakchi pog‘onalarni 6 gigabaytli operativ xotiraga ega bo‘lgan qurilmalar egalladi. Bu haqida Androidinsider.ru resursi ma'lum qildi. 

Ilk uchta o‘rin  «Vivo Xplay 5 Elite», «LeEco Max 2» va «Lenovo ZUK Z2 Pro» qurilmalariga nasib etdi. Bu uch qurilma o‘xshash xususiyatlarga ega bo‘lib, ularning barchasini «Snapdragon 820» protsessori va 6 Gb operativ xotira birlashtirib turadi. 

Ularning uchalasi ham taxminan bir xil ballga ega bo‘lishgan: eng samarador qurilma hisoblanmish «Vivo Xplay 5 Elite» - 138706 ball, «LeEco Max 2» - 138026 ball va «Lenovo ZUK Z2 Pro» esa 136853 ball to‘plashdi. 

To‘rtinchi va beshinchi o‘rinlarni «Snapdragon 820» protsessor va 4 gigabaytli operativ xotira bilan ta'minlangan «Xiaomi Mi5» va «Samsung Galaxy S7 Edge» qurilmalari egallashdi. 

Oltinchi hamda yettinchi pog‘onalardan 133781 va 131401 ball to‘plashga muvaffaq bo‘lgan «iPhone 6S», «iPhone SE» qurilmalari joy olgan. 

Sakkizinchi o‘rinda «LG G5» smartfoni joylashib, u 128232 ball to‘pladi. 

O‘ntalikning to‘qqizinchi qatorini 96756 ball bilan «Meizu Pro 6» qurilmasi band etdi va nihoyat, ro‘yxatni 94 mingdan sal ko‘proq ballga ega bo‘lgan «Honor V8» smartfoni yakunlaydi. 

Bunday natijalar kutilgan, ammo ilk to‘rtta o‘rinning xitoyliklarning brendlariga nasib etishi biroz ajablantiradi, axir avvallari birinchi o‘rinlarni nomdor brendlar egallar edi, Xitoy mahsulotlaridan esa ro‘yxatda faqat «Xiaomi» qurilmalarini ko‘rish mumkin bo‘lardi. 

Boshqa tomondan esa, «Xiaomi Mi5» va «Samsung Galaxy S7» u qadar yangi mahsulot emas, shu bois oxirgi paytda Xitoy bozorining sezilarli ravishda ko‘tarilganini hisobga oladigan bo‘lsak, ulardan mo‘'jiza kutishning hojati yo‘q.