Filadelfiya limonad ichimliklariga soliq solmoqchi

Kelasi haftada Filadelfiya shahar kengashi shakarli va parhez ichimliklarga soliq solish masalasi bo‘yicha ovoz beradi, deb xabar qilmoqda Associated Press agentligi. 

Dastlab shahar meri Jim Kenni limonadlarning bir untsiyasiga (0,029 l) 3 sentdan soliq solishni taklif etgan, ammo munozaralardan so‘ng, 1,5 sentga tushirilgan. Bu bir yarim litrlik kola ichimligi 76 sentga qimmatlashadi, deganidir. Agar qonun loyihasi ma'qullansa, undan tushgan mablag‘lar bolalar bog‘chalari, munitsipal maktablar va parklarga sarflanadi. 

Ovoz berish jarayoni boshlanmasdan tashabbusga qarshi chiqqanlar «hech qanday yangi soliqqa o‘rin yo‘q!» deya baqirishgan, bunga javoban loyiha mualliflarining «bolalar kutib tura olmaydi!» deganlarini eshitishgan. 

Qayd etilishicha, gazli shirin ichimlik ishlab chiqaruvchilar, mazkur qonun loyihasiga qarshi millionlab dollar sarflashgan. 

Aytish joizki, AQShdagi limonadlarga soliq solgan yagona shahar Kaliforniya shtatining Berkli shahri hisoblanadi. U yerda 126 ming kishi istiqomat qiladi. O‘z navbatida, 1,5 mln aholisi bilan Filadelfiya mamlakatning kattaligi bo‘yicha beshinchi megapolisidir. Shunga ko‘ra, agar qonun qabul qilinsa, u AQShning limonadlardan soliq oluvchi birinchi yirik shahri bo‘ladi.