Yevro-2016 UYeFAga rekord darajadagi daromad keltiradi

2016 yilgi Yevropa chempionati UYeFA homiyligi ostida o‘tgan barcha turnirlar orasida eng serdaromadlisi bo‘ladi. Bu haqda Bloomberg agentligiga asoslanib Tribuna.uz xabar tarqatgan.

Agentlikning baholashicha, tashkilot turnirni o‘tkazish evaziga 2 milliard  yevro daromad ko‘radi. Yevro-2012 orqali UYeFA 1,4 milliard yevro ishlab olgandi. Daromad miqdorining keskin darajada ortishiga turnir ishtirokchilari soni 16tadan 24taga yetgani sabab bo‘lgan.

O‘yinlarning teletranslyatsiyalari namoyishi huquqi sotilishi evaziga UYeFA 1,05 milliard yevro daromad qilgan, bu esa 4 yil avvaligadan 25 foizga ko‘proq. Homiylik to‘lovlari miqdori esa 40 foizga ortgan va 450 million yevroni tashkil qilgan. Daromadning qolgan qismi esa chiptalar sotuvi orqali kelishi nazarda tutilgan.

Taqqoslash uchun, Amerika Kubogi-2016 turniri o‘yinlari teletranslyatsiyasi sotilishi evaziga 112 million dollar daromad ko‘rilgan. Yevropa chempionatining 10 iyul kuni bo‘lib o‘tadigan final bahsi auditoriyasi 300 million kishini tashkil qilishi kutilmoqda.

Bundan tashqari, turnir o‘yinlari uchun 2,5 million chipta sotilgan, bu 4 yil oldin Polsha va Ukrainada o‘tkazilgan turnirda bu miqdor 1,5 million edi.