Italiyada Indesit asoschisi hayot bilan vidolashdi

Italiyaning mashhur xo‘jalik texnikalari ishlab chiqaruvchi Indesit kompaniyasi asoschisi hamda Italiya sanoati umumiy konfederatsiyasi (Confindustria) sobiq prezidenti Vittorio Merloni, uzoq davom etgan xastalikdan so‘ng, 83 yoshida hayotdan ko‘z yumdi, deb xabar qilmoqda Ilmessaggero nashri.

Merlonining raqifasi va 4 nafar farzandi bor edi. Fabriano shahri meri Twitterdagi sahifasida tadbirkorning oila a'zolariga hamdardlik izhor qilgan. 

Vittorio Merloni 1933 yili Fabriano shahrida dunyoga kelgan. Merloni 1975 yili, 2005 yildan Indesit Company deb ataluvchi xo‘jalik texnikalari ishlab chiqaruvchi Merloni Ettrodomestici kompaniyasiga asos solgan edi. 2010 yildan o‘g‘li Andrea kompaniya prezidenti sifatida faoliyat yuritmoqda. 

Ayni vaqtda, Indesit Yevropaning xo‘jalik texnikalari ishlab chiqaruvchi yirik kompaniyalaridan biridir.