Bugun Yevropa chempionatining barcha chorak finalchilari aniqlanadi. Parijdagi «Stad de Frans» stadionida Ispaniya hamda Italiya terma jamoalari 1/8 finalining markaziy bahsida maydonga tushishadi. O‘yin Toshkent vaqti bilan 21:00da boshlanadi.
Ispaniya musobaqani «D» guruhida boshladi va ikkinchi o‘rinni egalladi. Musobaqaning amaldagi chempionlari Turkiya va Chexiyani mag‘lub etishdi. Oxirgi turda esa Xorvatiyaga mag‘lub bo‘lishdi.
Italiya o‘zi qatnashgan «E» guruhida birinchi o‘rinni egalladi. Konte shogirdlari dastlabki ikki turda Belgiya va Shvetsiyani mag‘lub etib, birinchi o‘rin masalasini muddatidan oldin hal qilishdi. Ular uchun kerak bo‘lmagan Irlandiyaga qarshi o‘yinda ikkinchi tarkib bilan o‘ynab mag‘lub bo‘lishdi.
Bu o‘yinni tomosha qilish uchun yana bir sabab bor. Ular o‘tgan Yevropa chempionatining finalida to‘qnash kelishgan va o‘sha o‘yinda Ispaniya 4:0 hisobida g‘alaba qozongan edi. Italiya bugun o‘sha mag‘lubiyat uchun ham ikki hissa kuch bilan o‘ynaydi.
Ispaniya hamda Italiya terma jamoalari o‘rtasidagi o‘yinni tomosha qilish imkoningiz bo‘lmasa, tribuna.uz saytida olib boriladigan matnli reportajni kuzatib boring.