Dunyoga qalb ko‘zlari ila boqaylik

Yurtimizda muborak Ramazon shukuhi kezib yuribdi. Fazilatli kunlarga yurtdoshlarimiz xush kayfiyatda, tinch-omonlikda peshvoz chiqdilar. Ayniqsa, davlatimiz Rahbarining har yilgidek “Yurtimizda Ramazon oyini munosib tarzda o‘tkazish to‘g‘risida”gi Qarorlarini musulmonlarimiz mamnuniyat bilan qarshi oldilar.

Ana shunday muborak kunlarda ham doimgidek, ozmi ko‘pmi kundalik tashvishlar bilan ba'zida nolib, ba'zan kichik muammolardan zerikib yurgan kezlarimiz... internet tarmog‘idan dunyodagi yangilik va hodisotlarni o‘qib o‘tirib achchiq bir haqiqatni anglab yetdim. Hamda bu haqida yurtdoshlarimiz ham ogoh bo‘lishlarini xohladim...

“Terakt natijasida 6 kishi halok bo‘ldi...”
“Yaponiya janubida kuchli ko‘chki va toshqinlar ro‘y berdi...”
“BMT: jahonda qochqinlar soni 65 million kishiga yetdi...”
“Indoneziyadagi suv toshqinlari va ko‘chkilar 43 kishining hayotiga zomin bo‘ldi...”
“Xitoyda suv toshqini tufayli 400 ming kishi evakuatsiya qilindi...”
“Kobulda avtobus portlashi oqibatida 14 kishi qurbon bo‘ldi...”
“Kareliyada bolalarning halok bo‘lishi tufayli motam e'lon qilindi...”
“Kaliforniyada samolyot temir yo‘l bekatiga qulab tushdi...”
“Qozog‘iston janubida otishma sodir bo‘ldi...”...
(Internet axborot saytlaridan 19-20 iyun kunlari yangiliklaridan olindi)

Ha, bugun dunyo tinch emas. Hamma ham bizlardek xotirjam emas. Barcha ham Ramazonga mamnuniyat bilan peshvoz chiqayotgani yo‘q. Ba'zi yurtlarda talofatu tabiiy ofatlar avjiga chiqqan, yana ayrim davlatlar o‘z fuqarolarining xiyonatidan alamzada. Yana shunday o‘lkalar borki uning istiqomat qiluvchilari har yerda sarson-sargardon. Burda nonga zor norasidalarini bag‘riga bosib issiq uyidan ketishga majbur bechorahollar kam emas taassufki...

Payg‘ambarimiz Rasululloh (s.a.v.): “Kimki bir kun o‘z oilasi ichida tinch, tani sog‘ bo‘lib tursa va oldida shu kuniga yetarlik taomi bo‘lsa, u odamga go‘yo butun dunyo berilgan hisoblanadi”, degan ekanlar. Aziz va saodatli yurtdoshim! Bir marta bo‘lsa ham yurtingiz, oilangiz, hech bo‘lmaganda o‘zingiz uchun fikr yuriting. Bugun dunyoda nimalar sodir bo‘lmoqda, qalb ko‘zlaringizni oching. Barchasidan xabardor bo‘ling.

Biz issiqdan nolib hovlimizga qayta va qayta suv sepayotganimizda dunyoning qaysidir burchagida qultum suvga zor, yuqori haroratdan asranishga joy topolmayotgan minglab insonlar borligini o‘ylamaymiz. Uxlayotgan bolamiz oldida pichir-pichir gapiramizu qaylardadir kunlab oylab o‘q va portlashlar ovozidan halovat yo‘q, tinchlik yo‘q ko‘z yummagan go‘daklar borligini eslamaymiz. Yaqinlarimizga ozgina mehr berib, ko‘prog‘ini kutamiz, ko‘ngillariga ko‘p bor ozor beramiz, zaminning qay burchagida oila a'zolarini bir-bir yo‘qotayotgan kishilar holatini his qilmaymiz. Farzandlarimiz sho‘xligidan charchaymiz, savollari ortiqchadek tuyuladi... biroq qayerlardadir yuzlab chaqirimni dilbandini bag‘riga bosib yurib ketayotgan otalarning qayg‘usini tasavvurimizga sig‘dirolmaymiz...

Hadisi sharifda: «Ikki ne'mat borki, undan ko‘p kishilar mahrumdirlar, bu ne'matlar -  salomatlik va xotirjamlikdir», deyiladi. Ming bor shukrki, bugun biz baxtli kunlarda yashayapmiz, ertaga kelajak avlodimizga ham ana shunday saodatli hayotni qoldirishimiz kerak. Buning uchun tinchligimizni, xalovatu osoyishimizni ko‘z qorachig‘imizdek asramog‘imiz muhim. Binobarin, Allohning kalomida «Qasamki, agar (bergan ne'matlarimga) shukr qilsangiz, albatta, (ularni yanada) ziyoda qilurman» (Ibrohim, 7) deya marhamat qilinadi.

Hadislarda ham: “Ne'matga shukr qilish uning zavolidan omon saqlaydi”, deyiladi. Allohim, O‘zingga ming bor tashakkur deymiz. Tongda xotirjam uyg‘onishimiz, yaqinlarimiz sog‘-salomatligi, yonimizdaligi, yurtimiz tinchligi, osmonimiz musaffoligi... barcha-barchasi uchun O‘zingga behisob shukrlar bo‘lsin.

Sh.G‘aniyeva,
“Ziyo” studiyasi bosh muharriri