Musobaqa yakunigacha yana ikkita o‘yin bo‘lishiga qaramay, ko‘pchilik bugungi o‘yin g‘olibi Yevropa chempioni bo‘lishini taxmin qilmoqda.
Italyanlarga qur'a hatto g‘animingga ham ravo ko‘rmaydigan raqiblarni sovg‘a qildi – Yevropa chempionlari ortidan ularga jahon chempionlari to‘g‘ri kelganini qarang? Vohalanki, Antonio Konte shogirdlari guruh bosqichini namunali - birinchi o‘rinda yakunlagan va yengilroq qur'aga umid qilsa bo‘laverarar edi. Lekin, barchamizga ma'lumki, qiyinchiliklar - toblaydi. Katta ehtimol bilan bugungi bahsda g‘olib chiqqan jamoaga kelgusi umumiy g‘alaba uchun zo‘r imkoniyat eshigi ochiladi.
Jamoalar holati
Antonio Konte ispanlarga qarshi ajoyib uchrashuv o‘tkazgani bilan chorak final bahsida o‘z shogirdlaridan bundanda kuchliroq o‘yin ko‘rsatishlarini talab qilishi aniq. Ammo, murabbiyda tarkib bilan bog‘liq bir qator muammolar bor. Tyago Motta diskvalifikatsiyada, Daniele De Rossi va Kandreva ham o‘yinni o‘tkazib yuborishi mumkin. Bundan tashqari, italyanlarning o‘n bir o‘yinchisi kartochkalarda osilib turibdi va yana qiziqqonlik qilishsa, yarim finalni o‘tkazib yuborishadi.
Nemislarda bittadan sariq kartochka olgan futbolchilar soni to‘rt nafar. Yoaxim Lyov shogirdlari orasida jarohat olganlar umuman yo‘q. Demak, Germaniya termasi jangovar holatda. Bugun ko‘proq murabbiylar bahsiga guvoh bo‘lsak kerak.
Taxminiy tarkiblar
Italiya: Buffon, Bartsali, Bonuchchi, Kellini, Florentsi, Sturaro, Parolo, Jakkerini,De Shilo,Pelle, Eder.
Germaniya: Noyyer, Kimmix, Boateng, Xummels, Xyovedes, Kroos, Xedira, Myuller, O‘zil, Draksler, Gomes.
Asosiy va qo‘shimcha bo‘limlar bo‘yicha taxminiy hisob: 0:0
Germaniya hamda Italiya terma jamoalari o‘rtasidagi o‘yinni ko‘rish imkoningiz bo‘lmasa, Tribuna.uz saytida olib boriladigan matnli reportajni kuzatib boring.
Elmurod ERMATOV, Andijon.