Turkiya va Avstriya tashqi ishlar vazirlari twitter'da tortishib qolishdi

Turkiya tashqi ishlar vaziri Mavlud Chavusho‘g‘lu twitter'dagi sahifasida Yevropa ittifoqining migratsion siyosati haqida yozgan gaplari sabab Avstriya tashqi ishlar vaziri Sebastyan Kurts u bilan tortishib qoldi.

Chavusho‘g‘lu agar Yevropa ittifoqi Turkiya fuqarolariga tashkilot hududida vizasiz yurish imkonini bermaydigan bo‘lsa, qochoqlar oqimini to‘xtatish bo‘yicha shartlashuv buzilishi mumkin ekani haqida gapirgan.

Bu gapga munosabat bildirar ekan Kurts shunday deydi: «Men Chavusho‘g‘luning ultimatumini qabul qilmayman. Yevropa ittifoqi kimgadir bog‘liq bo‘lishi kerak emas. U o‘zini-o‘zi himoya qila olishi kerak».
Chavusho‘g‘lu esa bunga javoban «Bu ultimatum emas, shaxsiy fikrim. Buni so‘z erkinligi deydilar, do‘stim Sebastyan», deb izoh berdi.

Avvalroq Turkiya hukumati Yevropa ittifoqidan mamlakat fuqarolarini ittifoqqa kiradigan davlatlarda vizasiz yurishini ta'minlashini, aks holda Yevropaga kiradigan qochoqlar oqimini to‘xtatish bo‘yicha kelishuvni uzib qo‘yishi mumkin ekanini ta'kidlagandi. O‘tgan yili Yevropa ittifoqi va Turkiya qochoqlarlar oqimini to‘xtatish bo‘yicha shartnoma imzolashgan edi. Unga ko‘ra Turkiya tashkilotdan 3 milliard yevroni sanab olishi va evaziga Yevropaga kirib kelayotgan qochoqlar oqimini to‘xtatishi kerak edi.