Tramp Obamani AQSh tarixidagi eng yomon prezident deb atadi

AQSh prezidentligi uchun saylovda  Respublikachilar partiyasidan nomzod bo‘lgan milliarder Donald Tramp mamlakatning amaldagi prezidenti Barak Obamaning o‘zi haqidagi salbiy fikriga keskin javob qaytardi. U  Obamani mamlakatning butun tarixidagi eng yomon prezident sifatida baholagan.

«Prezident Obama tarixga kiradi, Qo‘shma shtatlarning eng yomon prezidenti sifatida!» — deya yozgan Tramp o‘zining Twitter ijtimoiy tarmog‘idagi sahifasida.

Shuningdek, Trampning saytida amerikaliklar yetakchisi keskin tanqid qilingan.

"Prezident Obama — omadsiz yetakchi, u Davlat kotibi Klinton bilan birga shunday tashqi siyosat yuritdiki, dunyoda beqarorlik yuzaga keldi. U ham, uning izdoshi Hillari Klinton ham prezident bo‘lishga shunchaki nomunosib", — deya qayd etgan milliarder.

U Obama va Klintonni Yaqin Sharqdagi vaziyatni izdan chiqarib, Iroq, Liviya va Suriyani IShID qo‘liga topshirishda,  Bengazida diplomatlarning o‘limiga yo‘l qo‘yishda ayblagan.

"Bundan tashqari ular Eronning yadroviy dasturini rivojlantirishiga yo‘l qo‘yib berishdi. Keyin ular o‘nlab urush faxriylarining tibbiy yordam kuta-kuta o‘lib ketishiga yo‘l qo‘yishdi", — deya qo‘shimcha qilgan Tramp.

AQSh prezidenti Barak Obama bundan oldinroq o‘z chiqishida Trampning mamlakatni boshqarishga qodir emasligini aytgandi.

Prezident Trampning amerikalik musulmonlarga munosabatini eslatgan va tashqi siyosat, xususan, Yevropa, Yaqin Sharq hamda Osiyo masalasida tushunchaga ega emasligini ta'kidlagan.

Obama Respublikachilar partiyasi vakillariga yuzlanib, ularni Trampni qo‘llab-quvvatlagani uchun tanqid qilgandi.

"Gap siyosiy qarama-qarshilikda emas. Sizlar nomzodni saralay bilmadinglar", degandi u.