Olimpiada latifalari

Sport muxlisining ayoli dugonasiga dedi: – Xo‘jayinim Olimpiada boshlanishi  bilan “Nima xohlasang ayt, faqat musobaqalar boshlanganida xalaqit bermasang bo‘ldi”, deydi. O‘tgan Olimpiadada uchta ko‘ylak oldirganman...  

Dzyudo bo‘yicha musobaqada sportchi qiz tatamiga 10 daqiqa kechikib chiqdi.
 – Nega? – degan savolga, – Butun dunyoga pardozsiz ko‘rinib bo‘ladimi? – deya javob berdi u.

Olimpiada chempioni bo‘lgan bokschidan so‘rashdi:
– Siz irimlarga ishonasizmi?
– Albatta, ana qarang, qo‘lqopimning ichida katta temir taqa turibdi...  

Muxbirlar sportchiga savol berishdi:
– Bilasizmi, futbolchi va xokkeychilarni muxlislar haqorat qilishadi?
– Men ham shunga hayron bo‘laman. Bizga o‘xshab o‘q otish bilan shug‘ullanuvchi merganlarni hech haqorat qilishmagan. 

Turli musobaqalarda kuchli raqibiga 16 marta imkoniyatni boy bergan tennischi oxirgisida uni yutgach, dedi:
– Bilib qo‘yinglar, hech kim meni qatorasiga 17 marta yuta olmaydi!

Suvda suzishda xitoyliklarga o‘yinni boy bergan ruslar ularga qarab shunday deyishdi:
– Balki, xokkey o‘ynab ko‘rarmiz.

Sport ko‘p insonlar uchun – kasb yoki xobbi. Yana bir toifadagi kishilar uchun esa televizordagi oddiy kanal, xolos... 

Basketbol savatchasi deyarli to‘p bilan bir xil o‘lchamda. Gandbol darvozasi biroz kattaroq. Futbol darvozasi esa juda katta. Biroq darvoza qancha katta bo‘lgani sari uni mo‘ljalga olish qiynlashib boraveradi.

Aytishlaricha, suvga sakrash bo‘yicha Olimpiada chempioni bo‘lgan sportchilar chuchvarani kostryulkaga tashlaganda, umuman suv sachramas emish...

– Sen o‘yinlarni qayerda ko‘rasan?
– Televizor orqali, pista chaqib ko‘raman.

Shunday qilib o‘yin 19:46 hisobida yakuniga yetdi. Kechirasiz, men vaqtni aytib yuboribman...

Elmurod Ermatov