Xitoyda 2016 yilning dastlabki 7 oyida internet orqali chakana savdo hajmi o‘tgan yilning shu davriga nisbatan 27,5 foizga oshib, 2,6268 trln yuanga (395 mlrd dollar) yetdi. Bu haqda Xitoy davlat statistika boshqarmasi hisobotida ma'lum qilindi.
"Internet orqali xarid qilish Xitoy aholisi orasida odat tusiga kirmoqda. Bu ishlab chiqaruvchilarga ham ta'sir qilishni boshlamoqda. Shungacha yetib bordiki, kompaniyalarning bir qismi o‘z mahsulotini faqatgina internet orqali sota boshladi", deb aytdi boshqarmaning rasmiy vakili Shen Layyun.
Hisobotda ta'kidlanishicha, Xitoyda internet-savdolar ulushi aholining umumiy xaridlari hajmida 11,6 foizga yetdi.
Ayni vaqtda Xitoy hukumati internet, elektron savdoning rivojlanishiga katta e'tibor qaratmoqda. Avvalroq Xitoy bosh vaziri Li Ketsyan kiberhudud innovatsiyalar uchun keng istiqbolli maydon hisoblanishini aytgandi. Uning aytishicha, ayniqsa logistika sohasida tub o‘zgarishlar yuz bermoqda.