Kompyuter jihozlari ishlab chiqaruvchi Logitech shveysar kompaniyasi "aqlli uy" uchun ko‘p vazifali pereklyuchatelni taqdim qildi. Yangi qurilma Pop Home Switch deb atalib, intellektual tizimlarni boshqarishni soddalashtirib, butun elektronikani bir universal pult yordamida nazorat qilishga imkon beradi.
Pop Home Switch kaft o‘lchamidek keladigan katta tugma kabi ko‘rinishga ega. U konsentratorga ulanadi, konsentrator esa Bluetooth LE orqali rozetkaga ulanadi. Kompaniyada ta'kidlanishicha, pereklyuchatel Phillips Hue va LIFX smart-lampochkalaridan tortib Lutron pardalari va August qulflarigacha barcha yirik kompaniyalarning "aqlli" uy jihozlari bilan ishlay oladi.
Qurilmani Android yoki iOS operatsion tizimi uchun mo‘ljallangan mobil dastur yordamida uchta harakatni bajarishga: tugmaga bir marta, ikki marta va uch marta bosishga dasturlash mumkin. Misol uchun, bir pult yordamida yotoqxonadagi yorug‘likni pasaytirish, musiqani yoqish va pardalarni ko‘tarish mumkin.
Barcha tugmalar bitta konsentratorga ulanadi va istalganda uni turli xonalar bo‘yicha joylashtirish mumkin. 100 dollarlik standart Starter Pack to‘plamiga ikkita Pop tugmasi va bitta xab kiradi. Tugmani alohida 40 dollarga sotib olish mumkin. AQShda tugma avgustdan boshlab sotuvga chiqariladi.