Kubalik inqilobchi, mamlakatning ko‘p yillik yetakchisi, 13 avgustda 90 yoshini qarshilagan Fidel Kastro Gavanada tavallud ayomi munosabati bilan o‘tkazilgan bayramga tashrif buyurdi, deb xabar bermoqda CNN telekanali muxbiri.
Kuba milliy qahramonining sharafiga uyushtirilgan bayram Karl Marks nomidagi teatrda bo‘lib o‘tdi va 5 mingga yaqin kishini to‘pladi. Komandantening o‘zi faxrli birinchi qatordan joy oldi.
Kastroning o‘ng tomonidan uning ukasi va Kubaning amaldagi rahbari Raul Kastro, chap tomonidan esa Venesuela prezidenti Nikolas Maduro joy egalladi. Bayram marosimi milliy televideniye orqali jonli efirda uzatildi.