Moskvada aktyor Yevgeniy Leonovning haykali ochildi

Moskvada mashhur aktyor Yevgeniy Leonovning qayta tiklangan haykali ochildi, deb xabar bermoqda RIA “Novosti” axborot agentligi. Haykalning tantanali ochilishi Moskva sharafiga o‘tkaziladigan Shahar kuniga bag‘ishlandi.

Marosimda madaniyat arboblari, jumladan Mark Zaxarov, Nikita Mixalkov va Iosif Kobzon ishtirok etdi.

"Yevgeniy Pavlovich buyuk aktyor va ajoyib shaxs bo‘lgan. Georgiy Nikolayevich Daneliya bu haykalni o‘g‘rilab ketganlarga minnatdorchilik bildirdi, chunki bugun Yevgeniy Pavlovich Leonov va uning filmini eslashga yana bir sabab bo‘ldi", deb aytdi Nikita Mixalkov.

Haykal Leonovning mashhur "Omadli jyentelmenlar" komediyasidagi o‘g‘ri Dosent qiyofasida tasvirlangan. Marosim oldidan orkestr komediyadagi mashhur musiqani ijro qildi. Haykal "Mosfilm"ning asosiy kirish joyi qarshisidagi Yulduzlar xiyobonida o‘rnatildi.

Eslatib o‘tamiz, bundan avvalroq haykal o‘g‘rilab ketilgandi. O‘g‘rilar uni temir-tersakka topshirib yubormoqchi bo‘lishgan.