O‘zbekistonda «O‘zagrokimyohimoya» aksionerlik jamiyati tashkil etiladi

O‘zbekistonda qishloq xo‘jaligi ekinlari va ularni agrokimyoviy himoya qilish ishlari kuchaytiriladi. Shu maqsadda, 2016 yil 24 oktabrda O‘zbekiston Respublikasi Prezidenti v.b. Shavkat Mirziyoyev tomonidan imzolangan «O‘simliklarni himoya qilish tizimini yaxshilash va qishloq xo‘jaligiga agrokimyoviy xizmat ko‘rsatishni takomillashtirish chora-tadbirlari to‘g‘risida»gi qaroriga muvofiq, «O‘zagrokimyohimoya» aksionerlik jamiyati tashkil etiladi.

Uning tarkibiga: 

«O‘zkimyosanoat» AJ tarkibidan chiqarilgan holda «O‘zagrokimyohimoya» AJning «Qishloqxo‘jalikkimyo» hududiy aksionerlik jamiyatlari qoshida barpo etiladigan hududiy bo‘linmalari hamda Qoraqalpog‘iston Respublikasi va viloyatlar o‘simliklarni himoya qilish markazlariga qarashli mulkning bir qismi; 

«Qishloqxo‘jalikkimyo» HAJ tarkibidagi tuman va tumanlararo bo‘limlari negizida tashkil etiluvchi «Agrokimyohimoya» HAJ tuman (shahar) bo‘limlari hamda o‘simliklarni himoya qilish bo‘linmalari;

Respublika o‘simliklarni himoya qilish va agrokimyo markazi tarkibiga kiruvchi Qoraqalpog‘iston Respublikasi va viloyatlardagi o‘simliklarni himoya qilish markazlari mol-mulkining bir qismi va chigirtkaga qarshi kurash xizmati negizida tashkil etiluvchi Qoraqalpog‘iston Respublikasi, viloyatlar va Toshkent shahrida chigirtka va tut kuyasiga qarshi kurash xizmatlari bo‘limlari;

Respublika o‘simliklarni himoya qilish va agrokimyo markazi tarkibiga kiruvchi Respublika agrokimyo stansiyasi, Qoraqalpog‘iston Respublikasi va viloyatlar agrokimyo stansiyalari negizida barpo etiluvchi «Agrokimyo stansiyasi» MChJ;

Respublika o‘simliklarni himoya qilish va agrokimyo markazi tarkibiga kiruvchi Respublika o‘quv-ishlab chiqarish biolaboratoriyasi negizida tashkil etiluvchi «Respublika o‘quv-ishlab chiqarish biolaboratoriyasi» MChJ;

Respublika o‘simliklarni himoya qilish va agrokimyo markazi tarkibiga kiruvchi O‘zbekiston o‘simliklarni himoya qilish ilmiy-tadqiqot instituti negizida tashkil etiluvchi «O‘simliklarni himoya qilish ilmiy-tadqiqot instituti» MChJ.

Prezident qarori bilan «O‘zagrokimyohimoya» AJning asosiy vazifalari va faoliyatining yo‘nalishlari aniqlab berilgan. Xususan, qishloq xo‘jaligini mineral o‘g‘itlar, o‘simliklarni himoya qilish kimyoviy va biologik vositalari bilan ta'minlash, chigirtka, zararkunandalar, o‘simliklar kasalliklari va begona o‘tlarga qarshi kurash borasida yagona texnik va texnologik siyosatni yuritish belgilangan.

Shuningdek, mazkur qaror bilan «O‘zagrokimyohimoya» AJ tashkiliy tuzilmasi va AJ tarkibiga kiruvchi 30ta tashkilot ro‘yxati tasdiqlangan. Qayd etilishicha, mazkur AJ boshqaruvi raisi va uning o‘rinbosarlari aksionerlik jamiyatining umumiy majlisida saylanib, lavozimga Vazirlar Mahkamasi tomonidan tasdiqlanishi qayd etilgan. Ular maqomi bo‘yicha vazir va vazir o‘rinbosarlari maqomiga tenglashtiriladi.