Qirg‘iziston o‘z fuqarosi Istanbul teraktiga aloqadorligi haqidagi ma'lumotni tekshirmoqda

Qirg‘iziston maxsus xizmatlari respublika fuqarosi Istanbuldagi teraktga aloqador bo‘lishi mumkinligi haqidagi ma'lumotni tekshiradi. Bu haqda RIA Novosti mamlakat Milliy xavfsizlik davlat qo‘mitasidagi manbaga asoslanib xabar bergan.

"MXDQ respublika fuqarosi Istanbuldagi teraktga aloqadorligi haqida tarqatilgan xabarni tekshirmoqda. Turkiya hukumatiga bu borada so‘rov yuborildi", — degan agentlikka qo‘mita matbuot xizmati boshlig‘i Rohat Sulaymonov.

Istanbuldagi Reina tungi klubiga Kalashnikov avtomati bilan qurollangan shaxs 1 yanvar kuniga o‘tar kechasi bostirib kirdi va Yangi yil bayramini nishonlayotgan odamlarni qirg‘in qildi. U hujum uyushtirgan vaqtda bino hududida 700ga yaqin kishi bo‘lgan va hujum oqibatida 39 kishi halok bo‘lib, 69 kishi jarohatlangan.

Hujum uchun javobgarlikni IShID o‘z zimmasiga olgan.

Avvaliga bu hujumni uyushtirgan terrorchi yo‘q qilingani haqida aytildi. Ko‘p o‘tmay bu ma'lumot inkor qilindi.

Ayni vaqtda ushbu terrorchini qidirish ishlari davom ettirilmoqda.

1 yanvar kuni politsiya terakt IShID a'zosi bo‘lgan O‘zbekiston yoki Qirg‘iziston fuqarosi bo‘lishi mumkinligi haqida xabar tarqatgandi.

Bugun terakt ijrochiligida gumonlanuvchining Istanbul bo‘ylab kezib yurganida o‘zi tomonidan olingan video namoyish etilgandi.

Ko‘p o‘tmasdan bu terakt Qirg‘iziston fuqarosi bo‘lgan 28 yoshli Yahyo Mashrapov tomonidan sodir etilgani haqida xabar tarqatildi.