Toshkentda nufuzli ACIBADEM (Turkiya) xalqaro klinikasi konsultativ markazining ochilish marosimi bo‘lib o‘tdi. Endilikda O‘zbekiston aholisi jahonga mashhur, yetakchi ekspertlarning tibbiy xizmatlaridan foydalanish yoki masofaviy konsultatsiya olish imkoniga ega bo‘ladi.
Ochilish marosimidan avval o‘tkazilgan matbuot anjumanida ACIBADEM klinikalar tarmog‘ining MDH mamlakatlarida investitsiya va biznesni rivojlantirish bo‘yicha bo‘lim rahbari Murat Pekmezo‘g‘li, Turkiyaning yetakchi gematologi, miya suyagini ko‘chirib o‘tkazish bo‘yicha mutaxassis Erjument Ovali, professor Siret Ratip, ACIBADEM'ning O‘zbekistondagi rasmiy vakili Iskandar Shamsiyev so‘zga chiqdi. Shuningdek, xalqaro mutaxassislar va klinika vakillari yangi axborot markazining maqsad va vazifalari haqida alohida to‘xtalib o‘tishdi.
OAV xodimlari esa tashkilotchilarga to‘g‘ridan-to‘g‘ri savollar berishdi.
Murat Pekmezo‘g‘li, ACIBADEM klinikalar tarmog‘ining MDH mamlakatlarida investitsiya va biznesni rivojlantirish bo‘yicha bo‘lim rahbari:
"ACIBADEM'ning yangi konsultatsiya markazi O‘zbekiston va Turkiya shifokorlari o‘rtasidagi hamkorlikni mustahkamlashda va uni yanada rivojlantirishda yangi maydon bo‘lishiga ishonamiz. Mana shunday professional darajadagi tajribalar almashinuvi ikki mamlakat tibbiyotining rivojiga o‘z xissasini qo‘shadi. O‘zbekistonda tibbiyot sohasining yuqori ko‘rsatkichda ekanligini alohida e'tirof etish lozim. Biz diagnostika va davolash, turli operatsiyalar o‘tkazish, shuningdek, boshqa tibbiy xizmatlar ko‘rsatish bo‘yicha hamkorlikda ishlash uchun qo‘shimcha sharoitlar yaratganimizdan juda mamnunmiz. O‘zbekistonlik shifokorlar uchun malaka oshirish va ta'lim dasturlarini tashkil qilish va bu yo‘nalishni yanada rivojlantirishga katta e'tibor qaratishni maqsad qilganmiz".
Abduno‘mon Sidiqov, O‘zbekiston Respublikasi Sog‘liqni saqlash vazirligining Xalqaro aloqalar bo‘limi rahbari:
"Hozirda sog‘liqni saqlash sohasiga investitsiyalar kiritish, yangi, zamonaviy tibbiyot uskunalari bilan ta'minlash hamda yuqori malakali xorijlik mutaxassislarni jalb qilish bo‘yicha ko‘plab tadbirlar amalga oshirilmoqda. Xorijning ko‘plab yetakchi tibbiyot markazlari hamkorlikda ishlash va O‘zbekistonda o‘z filiallarini ochish istagini bildirishdi. Shuni ham alohida qayd etib o‘tish joizki, malakali mutaxassislardan iborat bo‘lgan tibbiyot markazlari nafaqat poytaxtda, balki respublikamizning boshqa viloyatlarida, jumladan, Xorazm, Nukusda ham ochilishi rejalashtirilgan. Mazkur markazlarning faoliyat yuritishidan ko‘zlangan asosiy maqsad - yurtimizdagi tibbiyot sohasi vakillarini kardiojarrohlik, neyrojarrohlik, onkologiya, travmotologiya, pediatriya kabi turli yo‘nalishlarda o‘qitish va malakasini oshirishdan iborat.
