Antaliya sayyohlar uchun suv osti kemasida ekskursiya tashkil etadi

Antaliya endilikda sayyohlar uchun Nemo Primero deb nomlanuvchi kemada suv osti ekskursiyasini taqdim etadi.

Antaliya provinsiyasi gubernatori Munir Qorao‘g‘li Nemo Primero suv osti sayyohlik kemasida sayohat qilgan ilk ishtirokchiga aylandi. 

Nemo Primero 20 metr chuqurlikda suv qa'riga tushdi.

Qorao‘g‘lining jurnalistlarga bergan ma'lumotiga ko‘ra, joriy yilning aprel oyidan sayyohlar Nemo Primero kemasida suv tubiga sayohat qilishi mumkin bo‘ladi.

“Sayyohlar endilikda Antaliya akvatoriyasining suv osti dunyosi bilan yaqindan tanishishga muvaffaq bo‘lishadi”, - dedi gubernator.

Uning so‘zlariga ko‘ra, hattoki, turizm uchun eng og‘ir davr hisoblangan 2016 yilda ham Antaliyaga 6,5 milliondan ortiq sayyoh tashrif buyurgan.

Gubernatorning fikricha, 2017 yilda provinsiya mazkur sohada yanada yuqori ko‘rsatkichlarni qayd etishi kutilmoqda.