Yevropadagi eng yirik so‘l partiya tarixiy va falokatli mag‘lubiyatga qarab ketmoqda

O‘tgan yilning yozida Buyuk Britaniyada muxolif bo‘lgan Leyboristlar partiyasining taxminan 26 ming a'zosi undan chiqish haqida qaror qabul qildi. O‘tgan yilda esa partiya safiga 210 ming yangi tarafdor kelib qo‘shilgan. Bu haqda Times gazetasi yuqori mansabli leyboristlar tomonidan berilgan ma'lumotlarga asosan xabar bermoqda.

Nashr ma'lumotiga ko‘ra, bir yildan kamroq vaqt ichida partiya biletlarini topshirganlar soni “avvalgi olti yil” bo‘yicha ko‘rsatkichlardan oshib ketgan. Ta'kidlanishicha, ushbu siyosiy kuch tarkibidan chiqish haqida qaror qilganlarning uchdan ikki qismi 2015 yilgi umumiy saylovlardan so‘ng leyboristlar safiga kelib qo‘shilgan. Shu tariqa Yevropadagi eng yirik so‘l partiya yangi tarafdorlarni jalb etish bo‘yicha biroz sekinlashdi, ayni damda ularning soni 528 ming nafarni tashkil etmoqda.

Ma'lumki, o‘tgan oyda Leyboristlar partiyasining yetti mingga yaqin a'zosi yetakchi Jyeremi Kobrin partiyadoshlaridan tartib-intizomga rioya qilish va Birlashgan Qirollikni Yevropa Ittifoqidan chiqish jarayonini ko‘zda tutgan qonun loyihasini uchinchi o‘qishda qo‘llab-quvvatlashni talab qilganidan so‘ng, uni tark etgan.

Leyboristlar o‘tgan haftada Angliya shimoli-g‘arbidagi Kambriya grafligida parlamentga qo‘shimcha saylovlarda konservatorlarga mag‘lub bo‘lib, yirik zarbaga duch kelishdi. Bunday natija ushbu saylov uchastkasini 1935 yildan beri nazorat qilgan Leyboristlar partiyasi uchun katta yo‘qotish bo‘ldi. Partiya deputatlaridan biri Jon Vudstokning xavotirli fikrlariga ko‘ra, partiya 2020 yilga mo‘ljallangan keyingi umumiy parlament saylovlaridagi “tarixiy va falokatli mag‘lubiyatga qarab ketmoqda”.