Shayx Muhammad Sodiq Muhammad Yusufni xotirlab... (video)

Har bir insonning o‘z pinhoniy niyati bo‘ladi. U kim bo‘lishidan qat'iy nazar orzu niyat ila umrini o‘tkazadi. Farzandining kamolini ko‘rish va uni ortidan qoluvchi munosib zurriyot etib voyaga yetkazish har qanday kishining eng yuksak maqsadi, orzusi va niyatidir. Shayx Muhammad Sodiq Muhammad Yusuf munosib farzand bo‘ldilar va buning ajrini o‘z farzandlarida ko‘rdilar.

Shayx Muhammad Sodiq Muhammad Yusuf rohimahulloh Qiblagohlarini janozalarida aytgan marsiyalari:

"Azizim, dadajon! Qiblagohim! Qirq besh yil besh vaqt namozga qatnagan yo‘lingizdan hozir sizni sevgan qavmingiz yelkalarida ko‘tarib olib kelishdi. Qirq besh yillik oxirat yo‘lingiz oxiriga yetdi.
Azizim, dadajon! Qiblagohim! Qavmingizning ko‘zida sizga bo‘lgan muhabbatni ko‘ryapman.

Azizim, dadajonim! Qiblagohim! Mo‘min-musulmonlar sizga duo qilgani, janoza o‘qigani kelishdi. Qirq besh yil ularning janozalarini o‘qib, xizmat qildingiz. Endi bu qavm sizga mag‘firat so‘ramoqda. Ularning ko‘zlaridagi yosh iymon yoshlaridir. Sizdan ajralib qolganlariga yig‘lashmoqda.

Azizim, dadajonim! Qiblagohim! Qirq besh yil har namozga chiqqaningizda qo‘shni qabristondagilarning haqiga duo qilar edingiz, endi bu on o‘zingizni shu qabristonga qo‘ymoqchimiz. Toki masjidga kirgan har bir kishi, chiqqan har bir kishi haqingizga duo qilsin degan niyatimiz bor. Parvardigori olam, O‘zing dadamizni mag‘firat aylagin! Bu kishining ilm yo‘lida qilgan xizmatlari ko‘p. Payg‘ambarimiz alayhissolatu vassalom: "Odam bolasi vafot etsa, uning amallari kesiladi, faqat uch narsadan: sadaqai joriyadan, manfaatli ilmdan va duo qiladigan solih farzanddan kesilmaydi", deganlar.

Azizim, dadajon! Siz sadaqai joriyani juda ko‘p qilgan edingiz. Inshaalloh, sadaqai joriyangiz bardavomdir. Modomiki qilgan sadaqai joriyangizdan mo‘min-musulmonlar manfaatdor bo‘lar ekan, inshaalloh, savoblari sizga yetib boradi.

Azizim, dadajon! Qiblagohim! Siz olim edingiz, ilm tarqatgan edingiz. Ilmingiz manfaatli edi. Orqangizdan ilmli farzandlaringiz qoldi, shogirdlaringiz qoldi. Ilmlilarga yordam berdingiz. Bularning hammasi, inshaalloh, tarozingizni bosadigan, xayrga olib boradigan ishlar bo‘ladi. Inshaalloh, bundan keyin ham to qiyomatgacha qoldirgan manfaatli ilmingizdan o‘zingizga ajr-savob borib turadi!

Azizim, dadajon! Qiblagohim! Solih farzandlar qoldirdingiz, inshaalloh, farzandlaringiz doimo sizning haqingizda duoda bo‘ladilar, har o‘qigan namozlarida, o‘qiydigan duolarida sizni eslaydilar. Boshqa paytlarda ham duoni hech kanda qilmaydilar. Qolaversa, qavmingiz turibdi, ularning hammalari haqingizga duo qilishga tayyorlar. Inshaalloh, bu duolar Parvardigori olamning mag‘firatiga sabab bo‘ladi!"

Manba: Mehrob.uz

Yaqin kunlarda Kun.uz sayti bilan shayx Muhammad Sodiq Muhammad Yusuf ishlarining davomchisi, u kishining farzandlari Ismoilhoji Muhammad Yusuf bilan suhbat uyushtirish ham rejalashtirilgan.

Savollarga shayx Muhammad Sodiq Muhammad Yusufning antiqa javoblari

Shayx Muhammad Sodiq Muhammad Yusuf tartibda namuna ekanliklari hayotiy misollarda