Muhammad Amin Muhammad Yusuf o‘z akasi haqidagi noyob xotiralari bilan o‘rtoqlashdi

Odamlar borki, ular haqida gapirish emas, hatto eslash ham xush kelmaydi. Odamlar borki ular haqida gapirganda vaqt o‘z ahamiyatini yo‘qotadi. Chunki bunday zotlar haqida yillar, asrlar mobaynida gapirib kelinadi. Ularning qilgan ishlari, go‘zal xislatlari, o‘rnak bo‘lgudek axloqlari avlodlarga yetkaziladi. Ana shunday zotlardan biri Shayx Muhammad Sodiq Muhammad Yusuf hazratlari edi. 

Kun.uz hazratning inisi, Muhammad Amin Muhammad Yusuf bilan suhbat uyushtirdi. Mazkur suhbat davomida hazratning bolalik davridan tortib, ilm yo‘lida qilgan ishlariga qadar bo‘lgan umr yo‘li tilga olindi.

Bolalik xotiralari

“Bir safar xo‘rozqand olganimizda u kishi menga eng kattasi berib, o‘zlari eng kichigini olgan edilar. Buning boisini so‘raganimda keyinchalik bunga da'vo qilmasliging uchun, deb izoh bergan edilar. U kishi meni akam bo‘lishlari bilan birga har sohada ustozim ham bo‘lganlar”.

Oila masalasi

“Hazrat oila masalasiga juda e'tibor qaratganlar. Chunki o‘zbek xalqi oila degan tushunchaga jiddiy e'tibor qaratadi. Shu sabab u kishi bu mavzuda juda ko‘plab kitoblar yozib qoldirganlar. Eng muhimi oila masalasidagi qarashlarini o‘z oilalaridan boshlaganlar. Buning mevasi o‘laroq, bugungi kunga kelib, u zotning farzandlari otalari tomonidan xalqqa, vatanga, dinga qilgan xayrli ishlarini munosib davom ettirmoqdalar”.

Sport bilan hamnafaslik

“Hazrat sportni juda sevardilar. Bolaliklarida rus tilidan insho olishganida u kishi “Paxtakor” stadioniga qorovul bo‘laman”, degan mazmunda ijodiy ish yozganlar. Buning sababini so‘rashganida: “Maza qilib futbol ko‘rish uchun”, deb javob qaytarganlar. Umrlarining so‘ngiga qadar sport bilan hamnafas bo‘lib yashadilar. Hatto, taqdir ekan, sport zalida jon berdilar”.

Muhammad Amin Muhammad Yusuf bilan kechgan suhbatimiz juda maroqli bo‘ldi. U kishi akalari haqida chiroyli xotiralarni yodga oldilarki, ko‘rib kishi havas qiladi. Mazkur suhbatni saytimizning YouTube kanalida tomosha qilishingiz mumkin.