2026-yil 20-oktabr kuni Oʻzbekiston musulmonlari idorasi tashkil etilganiga 83 yil toʻldi. Shu munosabat bilan Kun.uz Musulmonlar idorasi matbuot xizmati hamkorligida ushbu muassasa faoliyati haqida maʼlumotlarni jamladi.
Musulmonlar idorasining maʼlum qilishicha, 1943-yilning ayni shu kuni Toshkentda boʻlib oʻtgan ulamolar va din arboblari qurultoyida mazkur tuzilmaga asos solingan.
Idora Ikkinchi jahon urushi yillarida, Sovet hukumati dinga nisbatan cheklovlarni yumshata boshlagan bir paytda tuzilgan. 1943-yil yozida toshkentlik olim Eshon Boboxon ibn Abdulmajidxon boshchiligidagi ulamolar Oʻrta Osiyo va Qozogʻiston musulmonlarini yagona diniy boshqarmaga birlashtirish tashabbusi bilan chiqqan. Ular SSSR Oliy Kengashi Prezidiumi raisi Mixail Kalininga murojaat qilgan, oʻsha yili iyulda esa idora ochishga rasmiy ruxsat olingan.
Ilk qurultoy 1943-yil 15–20-oktabr kunlari Eshon Boboxonning Qorasaroy koʻchasidagi hovlisida boʻlib oʻtgan. Unda besh respublikadan kelgan 160 dan ziyod vakil Eshon Boboxonni bir ovozdan Oʻrta Osiyo va Qozogʻiston musulmonlari diniy boshqarmasi raisi, besh respublika muftiysi etib saylagan.
Idora tarixi davomida bir necha marta nomini oʻzgartirgan. Sovet davrida muftiyat «diniy boshqarma» deb atalgan. 1990-yillar boshida mintaqadagi har bir respublika oʻz diniy boshqarmasini tuzgan.
1992–1995-yillarda Oʻzbekistondagi idora Movarounnahr musulmonlari idorasi deb atalgan, 1996-yildan esa Oʻzbekiston musulmonlari idorasi nomini olgan.
Hovlidan mahobatli markazgacha
