Rossiya armiyasi 8 yildan keyin gipertovushli qurol bilan ta'minlanadi

Rossiya armiyasi 2025 yilgacha yangi gipertovushli qurollar bilan ta'minlanadi. Bu haqda Rossiya mudofaa vazirligi saytida ma'lum qilindi.

"Qurollanishning 2018-2025 yilga mo‘ljallangan yangi dasturida gipertovushli qurol, intellektual robototexnik majmualar, yangi jismoniy tamoyillarga asoslangan qurol hamda keyingi avloddagi an'anaviy qurol, maxsus texnikani yaratishni yakunlab, ularni qo‘shinlarga yetkazib berish vazifasi qo‘yilgan", deb aytilgan xabarda. 

Harbiylarning ta'kidlashlaricha, ushbu qurollarni yaratish uchun bir qator ilmiy-texnik vazifalarni hal qilish talab etiladi va ularni ilmiy hamjamiyatni jalb qilmasdan hal qilishning iloji yo‘q.

15 aprelda kemalarga qarshi yangi gipertovushli "Tsirkon" raketasi sinov vaqtida tovush tezligidan 8 karra kattaroq tezlikka erishgani ma'lum qilingan.

"Tsirkon" (3M22) qanotli raketalarini yaratish ustida ishlar 2011 yildan beri "Takticheskoye raketnoye voorujyeniye" korporatsiyasi tomonidan olib boriladi. Ushbu raketaning texnik ko‘rsatkichlari sir saqlanadi. 2016 yil fevraldan raketa sinala boshlangan, 2018 yildan esa seriyali ishlab chiqarilishi kerak.