Rossiyalik bloger Yuriy Dud o‘zining «VDud» kanalida rossiyalik muxolifatchi, yurist va bloger, «Korrupsiyaga qarshi kurashish fondi» asoschisi Aleksey Navalniy bilan katta intervyu uyushtirdi. 2018 yilgi Rossiya prezidentlik saylovlariga o‘z nomzodini ilgari surayotgan Navalniy, jumladan, markaziy osiyolik mehnat migrantlari haqidagi fikrlarini ham ochiqlagan.
Quyida intervyuning ana shu qismida aytilgan gaplarni e'tiboringizga havola etamiz.
Yuriy Dud.: - Siz millatchimisiz?
Aleksey Navalniy.: - Juda ko‘pchilik meni shunday inson, deb biladi. Boz ustiga, jamoatchilikning liberal qismi meni ko‘pincha millatchi, deb hisoblaydi, millatchilar esa liberast, deb ta'na qilishadi. Begonalar ichra o‘zimniki, o‘zimnikilar ichra begonadekman. Bu mafkuraviy tamg‘alarning birortasini menga nisbatan qo‘llab bo‘lmaydi. Mening saylovoldi dasturimda bir punkt bor va uni millatchilik ruhida, deb hisoblashadi. Bu — Markaziy Osiyo davlatlari bilan viza rejimini joriy qilish.
Yu.D.: - Kavkazorti davlatlari bilan ham...
A.N.: - Ha, Kavkazorti davlatlari bilan ham va bu yerda hech qanday millatchilikni ko‘rmayapman. Chunki Germaniya menga vizasiz kirishga ruxsat bermaydi-ku? Men esa davlatimizga O‘zbekiston va Tojikistonning fuqarolari vizasiz kirib kelishini istamayman. Bu mutlaqo me'yordagi, Yevropaga xos chora.
Yu.D.: - Bu holatda siz Yevropa ittifoqi bilan vizalar bekor bo‘lishini istaysiz-a?
A.N.: - Albatta.
Yu.D.: - Xo‘sh, tojikning nemisdan nimasi yomon?
A.N.: - Chunki nemis rivojlangan davlatda yashaydi, iqtisodiy, siyosiy jihatdan rivojlangan mamlakatda. Men tojik inson sifatida, shaxs sifatida, mavjudot sifatida nemisdan yomonroq, deb hisoblamayman, aslo. Lekin bir narsasiz shubhasiz fakt sifatida qayd etmoq kerakki, men real hayotda yashayapman va ko‘ryapmanki O‘zbekiston va Tojikiston kamroq rivojlangan davlatlar, u tomonlardan narkotrafik keladi, u yerdan kelayotgan insonlar yurtida maoshlar kam bo‘lgani sababli, yaxshiroq hayotni izlab kelishadi, u yerda yashash xavfli, shu sababli biz migratsion vaziyatni nazorat ostiga olish uchun viza rejimini joriy etishimiz kerak.
