AQShning 112 mln dollarlik harbiy samolyoti bir dona qushga "dosh bera olmadi"

AQShning B-52N strategik bombardimonchi samolyotining Guamda falokatga uchrashiga qush sabab bo‘lgan. Bu haqda Associated Press axborot agentligi xabar bermoqda.

AQSh harbiy-havo kuchlari vakilining aytishicha, 2016 yil 19 mayda yuz bergan falokatga qushning dvigatelga tushishi sabab bo‘lgan. Tergovning aniqlashicha, qush dvigatelga tushgach, samolyot havoga ko‘tarilish vaqtidayoq tortish kuchini yo‘qota boshlagan va uchuvchi samolyotni favqulodda qo‘ndirishga qaror qilgan. 

Biroq qo‘nish vaqtida samolyotning tezligini hattoki tormoz parashyutlari bilan ham maqbul o‘lchamlarga tushirishning iloji bo‘lmagan va 112 mln dollarlik samolyot uchish-qo‘nish yo‘lakchasi tashqarisiga chiqib ketib, alangalanib, butkul yonib ketgan. Samolyot ekipajining barcha 7 a'zosi samolyotni tark etishga muvaffaq bo‘lgan.  

Uchuvchining aytishicha, samolyotdagi asboblar tortish kuchining keskin tushishini qayd qilganda, u bu paytda havoda qushlar uchib yurganini kuzatgan.