AQSh Hindiston harbiy-havo kuchlariga umumiy qiymati 2 mlrd dollardan oshadigan 22 ta harbiy dron yetkazib berishni rejalashtirmoqda. Bu haqda 22 iyunda bu bitim bo‘yicha muzokaralar borishidan xabardor bo‘lgan manbaga iqtibos keltirgan holda Reuters axborot agentligi xabar berdi.
Axborot agentligi ma'lumotlariga ko‘ra, Pentagon bu bitim haqida Hindiston bosh vaziri Narendra Modining 26 iyunda AQShga tashrifi oldidan e'lon qilmoqchi. Modini Vashingtonda AQSh prezidenti Donald Tramp kutib oladi.
Bort qurol-aslahasi bo‘lmagan dronlarning yetkazib berilishi ikki davlat o‘rtasida harbiy sohadagi hamkorlikni mustahkamlashga yo‘nalish olinganini ko‘rsatishga qaratilgan.
2016 yil avgustida Business Standard nashri ma'lum qilganidek, Hindiston mudofaa vaziri Manoxar Parrikar AQShga tashrifi vaqtida AQShning Predator turidagi dronlarini sotib olish imkoniyatini muhokama qilmoqchi bo‘lgan. Nashr ma'lumotlariga ko‘ra, Nyu-Dehli kelajakda "Hindistonda tayyorla" dasturi doirasida qo‘shma korxona negizida Hindistonda dronlar yaratishni rejalashtirmoqda va tegishli ishlanmalarni qo‘lga kiritmoqchi.
Avvalroq TASS axborot agentligi xabar bergandek, Vashington Hindistonga zamonaviy harbiy dronlar va ularni ishlab chiqarish texnologiyasini berishdan bosh tortgan. Biroq Hindiston 2016 yil iyunda Raketa texnologiyalari ortidan nazorat tartibiga qo‘shilgan va uning AQSh dronlarini xarid qilishga imkoni oshgan. Ushbu tartib 30 dan ko‘proq davlatni birlashtiradi. Uning asosiy maqsadi yadroviy qurolni yetkazuvchi dronlarni yaratishga ko‘mak beruvchi uskunalar va texnologiyalarni yetkazib berishni nazorat qilish orqali yadroviy qurol tarqalishi xatarini kamaytirishdan iborat.
