O‘zbekistonlik talabalarni xorijda o‘qitishga 42 mlrd so‘m mablag‘ ajratiladi

2 avgust kuni Xalqaro Press-klubda “Oliy ta'lim: rivojlanish yo‘lida” mavzusida sessiya bo‘lib o‘tdi. Unda Prezident Shavkat Mirziyoyevning "Iste'dod" jamg‘armasi faoliyatini isloh qilishga doir imzolagan farmoni yuzasidan ham fikr almashildi. Mazkur farmon mamlakat iqtisodiyotni o‘z vaqtida yuqori malakali va raqobatbardosh mutaxassislar, pedagog va ilmiy kadrlarni magistratura va PhD yo‘nalishlari bo‘yicha xorijda tayyorlash yo‘li bilan ta'minlashni nazarda tutadi. 

O‘zbekiston Respublikasi Prezidentining chet elda stipendiatlarning malaka oshirishi, stajirovka o‘tashi va ta'lim olishini tashkil etish “Iste'dod” jamg‘armasi ijrochi direktori Abdunabi Pardayevning sessiyada ma'lum qilishicha, jamg‘arma tashkil etilganidan buyon o‘tgan 14 yil mobaynida u mazkur maqsadlarga jami 12 mlrd so‘m ajratgan. Endilikda gap 42 mlrd so‘m haqida bormoqda. 

“Avvalgi dasturlarimizni amalga oshirishda gap mablag‘ga borib taqalar edi. Ya'ni homiylarning erkin ajratmalariga. Bizning 12 yillik faoliyatimiz mobaynida taxminan 12 mlrd so‘m talabalarni xorijda o‘qitishga sarflangan bo‘lsa, hozirgi bir yillik dasturni amalga oshirish uchun 42 mlrd so‘m ajratish haqida gap bormoqda”, - dedi Abdunabi Pardayev.

Uning so‘zlariga ko‘ra, bugungi kundagi vazifalarni bajarish uchun maqsad aniq qo‘yilayapti: kim tayyorlanadi, qayerda tayyorlanadi, qaysi dastur asosida tayyoralanadi, necha nafari necha yilda tayyorlanadi, kabi savollar hal etilgandan so‘ng, ta'lim berishga kirishilmoqda. 

Bundan tashqari, “Umid” jamg‘armasi bilan bo‘lgan tajribadagi kabi xorijda tahsil olib kelganlar O‘zbekistonga qaytganlaridan keyin ish topish muammosiga duch kelmasliklari uchun ular o‘qishga yuborilmasdan oldin bu masala hal etilayapti. Bunda xorijda o‘qishga nomzod ishlab chiqarish birlashmasi, korxona yoki firma buyurtmasi va qaytib kelgach unda ishlashi borasidagi va'dasiga asosan va chet elga o‘qish yuboriladi.

“Ajratilayotgan mablag‘lar magistratura va PhD doktorantura dasturlari bo‘yicha tahsil olishga hamda ilmiy xodimlar uchun bir yillik malaka oshirish kurslariga ajratiladi. Bugungi kunda biz uchun kadrlar masalasini hal etish ijtimoiy sohani rivojlantirishda muhim ahamiyat kasb etmoqda. Jamg‘arma esa, asosan, Moliya vazirligi huzuridagi Oliy o‘quv yurtlari moddiy-texnik bazasini rivojlantirish jamg‘armasi mablag‘lari hisobidan moliyalashtiriladi”, - deya izoh berdi Pardayev.