O‘zbekiston va Qirg‘iziston tovar ayirboshlashni oshirishga kelishib olishdi

O‘zbekiston va Qirg‘iziston yetkazib beriladigan mahsulotlar ro‘yxatini kengaytirmoqchi. Bu haqida O‘zbekistonning Qirg‘izistondagi favqulodda va muxtor elchisi Komil Rashidovning konferensiyadagi bayonotiga asoslanib, 24kg xabar berdi. 

"Prezidentlarning siyosiy irodasi tufayli tomonlar muammolar yechimini topishmoqda. Muntazam siyosiy muloqot o‘z mahsullarini bermoqda. Qirg‘iz-o‘zbek munosabatlari tarixida birinchi marta idoralararo komissiya yig‘ilishi bosh vazirlar darajasida o‘tkazildi. Avval ularni bosh vazirlarning birinchi o‘rinbosarlari boshqarishgan", - dedi Komil Rashidov. 

Uning so‘zlariga ko‘ra, tomonlar tovar ayirboshlashni oshirishga kelishib olishgan. O‘zbekiston Qirg‘izistonga avtomobil, qishloq xo‘jaligi texnikasi, o‘g‘it, maishiy texnika, to‘qimachilik va qurilish materiallari yetkazib berishga tayyor. Qirg‘iziston esa, o‘z o‘rnida ko‘mir, go‘sht, sut, meva va sabzavot, trikotaj mahsulotlarini taklif qildi.

Ta'kidlash joizki, 16 avgust kuni Bishkek shahrida ikki tomonlama hamkorlik, chegaralar delimitatsiyasi va demarkatsiyasi bo‘yicha hukumatlararo komissiya yig‘ilishi bo‘lib o‘tdi. O‘zbekiston bosh vaziri Abdulla Aripov Qirg‘iziston rahbariyati bilan qator uchrashuvlar o‘tkazdi.