KXDR AQShga "aziyat va jafo"ni va'da qilmoqda

KXDRning bayonot berishicha, AQShning sanksiyalari va bosimi "mutlaq uzoqni o‘ylamaslik bosqichi"ga kirdi. Pxenyan shu munosabat bilan Amerikaga nisbatan "ular shu paytgacha ko‘rmagan qat'iy choralar ko‘rishni rejalashtirmoqda". Shimoliy Koreya TIV bayonotini KMTA e'lon qildi, deb yozmoqda RIA Novosti. 

"AQSh tomonidan KXDRning mavjud bo‘lish va suveren huquqini to‘liq yo‘q qilish maqsadidagi sanksiyalar va bosim mutlaq mas'uliyatsizlik bosqichiga kirmoqda. AQSh KXDRning vodorod bombasi sinovini o‘tkazishiga qarshi BMT Xavfsizlik kengashida hiyla qilish yo‘li bilan eng qat'iy "sanksiya rezolyutsiyasi"ni ishlab chiqmoqchi", — deyiladi bayonotda. 

TIV qayd etishicha, "o‘ta qudratli termoyadro quroli"ni "AQSh tomonidan ko‘rsatilayotgan barcha dushmanona harakatlar va Koreya yarim oroli hamda mintaqaga xavf solayotgan yadro urushi tahdidini kamaytirish" vositasi sifatida ishlab chiqdi. 

"KXDR AQSh harakatlarini diqqat bilan kuzatmoqda... KXDR mutlaq choralarning har qanday shaklini qo‘llashga tayyor. KXDR qo‘llaydigan bo‘lg‘usi choralar AQShga shunchalik aziyat va og‘riq yetkazadiki, ular o‘z tarixlarida bunday jabrga duch kelishmagan. … Dunyo KXDR amerikalik jinoyatchilarni qanday qilib tinchlantirganiga guvoh bo‘ladi", — deyiladi xabarda. 

Bugun 11 sentabr kuni AQSh BMT XK muhokamasiga KXDRga nisbatan yangi jazo choralari bo‘yicha rezolyutsiyani kiritishni rejalashtirgan. Bundan tashqari, BMT XK sanksiya qo‘mitasining Pxenyan mavjud sanksiyalarga qanchalik rioya qilayotganiga doir majlisi ham bo‘lib o‘tadi.