O‘tgan haftada paxta tufayli iste'foga chiqarilgan Denov tumani hokimi bugun lavozimdan rasman ozod etildi

Surxondaryo viloyatining Denov tumani hokimi Bahrom Xurramovich Mamatqulov lavozimidan ozod etilgan. 

Surxondaryo viloyati matbuot xizmati xabar berishicha, bugun, 20 oktabr kuni xalq deputatlari Denov tuman kengashining navbatdan tashqari sessiyasi vaqtida Bahrom Mamatqulov rasman lavozimdan ozod etilgan.

Iste'foga tuman hokimi aholidan murojaatlar tushishi soni ko‘paygan, muammo va masalalarga e'tiborsizlik bilan qaralgani, shuningdek, tumanning iqtisodiy ko‘rsatkichlari pasayib ketgani sabab sifatida ko‘rsatilgan.

Kun.uz manbasi ma'lumotiga ko‘ra, u 14 oktabr kuni O‘zbekiston bosh vaziri Abdulla Aripov ishtirokida o‘tkazilgan favqulodda yig‘ilish vaqtida paxta terimini tashkillashtira olmagani uchun ishdan ketgandi.

Endilikda tumanga Ulug‘bek Berdiqobilovich Qosimov yangi hokim etib tayinlangan. Ulug‘bek Qosimov mutaxassisligi bo‘yicha yurist, u shu kunga qadar Muzrabot tumani hokimi sifatida ishlab kelayotgandi.