Minus 8. Madridga «qish keldi»

«Real» chempionatda ikkinchi marta mag‘lub bo‘lib, turnir jadvali peshqadami «Barselona»dan 8 ochkoga ortda qola boshladi.

Madrid Kataloniyada yutqazdi

Madridliklar Kataloniyada, mavsum debyutanti «Jirona»ga qarshi prinsipial bahsda mag‘lub bo‘ldi.

O‘yin Kataloniyadagi voqealar tufayli qoldirilishi ham mumkin edi. «Real» bosh murabbiyi Zinedin Zidan Ispaniya kubogida «Fuenlabrada»ga qarshi o‘yindan keyin o‘yin qoldirilishi haqida o‘ylamayotganini aytdi. Nacho qo‘shimcha qildi: «Biz o‘yin qoldirilishi mumkinligi haqida eshitdik. Ammo biz o‘ynamoqchimiz, hech qanday muammo yo‘q».

Ikki jamoa o‘rtasidagi o‘yin Kataloniyadagi siyosiy inqiroz fonida yanada katta ahamiyat kasb eta boshladi. Shu kunlarda Kataloniya mustaqillik e'lon qilgan, Madrid esa hudud rahbariyatini ishdan bo‘shatgan. Sabadelyadagilar ispan pasportlarini yoqa boshlashdi, eng radikal katalonlar yashovchi Jironada esa Ispaniya bayroqlari hukumat binolaridan tushirildi. 

Shu tufayli «Real» bu o‘yinga Ispaniyaning bosh ramzi sifatida keldi, «Jirona» esa katalonlar umidi edi. 

«Qirollik» xavfsizligi»

Poytaxtliklar xavfsizlik choralarini ko‘rishdi, «Real» Kataloniyada Ispaniya bayrog‘i tushirilgan avtobusda harakatlanmaslikka rozi bo‘ldi, jamoaga mezbonlarning avtobusi taqdim etildi. Madrid bu orqali og‘ir siyosiy vaziyatda kataloniyaliklarning g‘azabini keltirishdan tiyildi. Bunga izoh sifatida «Real» avtobusi Londonga yuborilganini, jamoa keyingi haftada Londonda YeChL doirasida «Tottenhem»ga qarshi o‘ynashini aytishdi. Ammo asl sabab nimadaligini barcha bilardi.

Shanbadan yakshanbaga o‘tar kechani «Real» Ispaniyada eng qattiq qo‘riqlangan mehmonxonada o‘tkazdi. Bu mehmonxona shu kuni haqiqiy «qirollik bunkeri»ga aylandi. Aytishlaricha, madridliklar avvaliga Jironada ikki kun bo‘lish g‘oyasidan voz kechib, o‘yin yakunlanishi bilanoq shaharni tark etishni rejalashtirishgan. Ammo birinchi reja o‘zgartirilmadi, futbolchilarning yaxshilab dam olishi birinchi o‘ringa chiqarildi.

«Real»ning omadi

Aslida vahima qilib yuborishdi. Ha, Jironada «Real» jiddiy muammolarga duch keldi, ammo barchasi maydonda va faqat futbol bilan bog‘liq muammolar, aslo siyosatga aloqador emas. O‘yin boshlangan vaqtda, mahalliy vaqt bilan soat 16:15da maydonning yarmi yorug‘, yarmiga soya tusha boshlagandi. Birinchi bo‘limda mehmonlar quyoshga qarshi o‘ynashdi, lekin aynan birinchi bo‘limda jamoa yaxshi o‘ynadi, 1:0 hisobidagi ustunlik bilan tanaffusga yo‘l olindi. Avvaliga mezbonlar hujumi vaqtida to‘p to‘singa tegib qaytdi, madridliklar tezkor qarshi hujumga o‘tdi, darvozabon Krishtianu Ronalduning zarbasini qaytardi, qaytgan to‘pga birinchi bo‘lib yetib kelgan Isko esa darvozani ishg‘ol qildi.

Qayd etish kerakki, bu mavsumda Madrid jamoasiga darvoza to‘sinlari ko‘p bora yordam bermoqda. 9 marta jamoa raqiblari «Real» darvoza to‘sini tufayli gol ura olmagan. «Jirona» futbolchilari ham ikki marta «Real» darvozasi to‘sinini poylashdi. 

Maydon egalari ikkinchi bo‘lim boshida keng ko‘lamli hujumga o‘tishdi va 4 daqiqadayoq hisob tenglashtirildi. Stuani Ramos va Nachoni masxara qilib aldab o‘tdi va darvozaning yaqin burchagini aniq nishonga oldi.

Keyin esa Portu Maffeoning pasini golga aylantirdi.

Madrid - minus 8

Zidan yutqazishni istamagandi. U 3 himoyachili sxemaga o‘tdi, qanotlardan Marselo va Ashraf Hakimini olib, Vaskes va Asensioni maydonga tashladi. Ammo o‘yinning qolgan daqiqalarida «Jirona» devorga aylandi va mavsumdagi ikkinchi g‘alabasiga erishish uchun uni himoya qildi. Yaqindagina mustaqillik e'lon qilgan Kataloniya Respublikasi o‘zining ilk katta muvaffaqiyatini nishonladi.

«Real» 1990 yildan buyon ilk marta debyutantga qarshi uchrashuvni boy berdi. Ronaldu va Benzema yana golsiz maydonni tark etdi.

Bir kun ilgari Bilbaoda o‘z o‘yinida g‘alaba qozongan «Barselona» turnir jadvalida «qaymoqranglilar»dan 8 ochko oldinga o‘tib ketdi. Hali qishgacha uzoq, ammo Madridga oktabrdayoq qish keldi, deraza ortida - 8 daraja.

Zinedin Zidan o‘yindan avval vahima qilmayotgandi, ammo endi xavotirga tushmoqda: «Bizda yaxshi va yomon kunlar bo‘ladi. Raqiblarimizda ham. Bizning o‘yinimizda intensivlik yetishmadi deyish to‘g‘ri emas. Biz harakat qildik, ammo shunda ham yutqazganimiz tashvishli. Konsentratsiya yetishmadi».

Krishtianu Ronalduning Ispaniya chempionatidagi statistikasi: 6 o‘yinda 1 gol. 

Kataloniya Respublikasi prezidenti (Jironaning sobiq meri va shu shahar jamoasi muxlisi) Karles Puchdemon bu o‘yindan keyin Madrid tomon xitob qildi: «Jirona» jahonning eng yaxshi jamoalaridan biri ustidan g‘alaba qozonib, barcha uchun ibrat bo‘la oldi. Bu g‘alaba ko‘p narsani anglatadi».

Eslatib o‘tamiz, Kataloniyadagi mustaqillik referendumidan keyin saylovchilarning aksar qismi Ispaniyadan ajralib chiqish tarafdori ekani ma'lum bo‘ldi. Shunga asoslanib, 27 oktabr kuni Puchdemon mustaqillik e'lon qildi. Ammo Madrid  Kataloniyani muxtoriyatdan mahrum qildi va bu o‘lkani to‘g‘ridan-to‘g‘ri boshqarishini e'lon qildi.