12:30 / 14.11.2017
13324

Eng tanish raqib. O‘zbekiston terma jamoasi 16-marta BAAga qarshi o‘ynaydi

Foto: The National

Bugun, 14 noyabr kuni O‘zbekiston terma jamoasi Al-Ayn shahridagi «Hazza bin Zayd» stadionida BAA terma jamoasi bilan o‘rtoqlik bahsini o‘tkazadi.

Bu o‘yinda Ro‘ziqul Berdiyev terma jamoa bosh murabbiyi vazifasini bajaruvchi sifatida ilk marotaba yigitlarni maydonga olib tushadi.

BAA termasi O‘zbekistonga eng ko‘p raqib bo‘lgan jamoadir. Bugungi bellashuv o‘zaro o‘yinlar tarixidagi 16-bahs bo‘ladi. Bundan tashqari, eng ko‘p duch kelgan raqiblar orasida Janubiy Koreya (15 marta) va Qatar (13 marta) ham bor.

BAA eng noqulay raqiblarimizdan biridir. O‘zbekiston terma jamoasi aksariyat o‘yinlarda tashabbusga ega bo‘lsa-da, atigi 3 marta raqib kuragini yerga tekkiza olgan, 4 marta durang o‘ynab, 8 marta yutqazgan. Tabiiyki, to‘plar nisbati ham raqib foydasiga - 17:23

Qizig‘i shundaki, biz BAA terma jamoasini faqat safarda mag‘lub eta olganmiz. O‘z maydonimizda 4 marta o‘ynagan bo‘lsak, faqat bir marta durang qayd etganmiz xolos.

O‘zbekiston va BAA terma jamoalarining o‘zaro o‘yinlari

1. 1996 BAA - O‘zbekiston 4:2 (o‘rtoqlik o‘yini)
2. 1996 BAA - O‘zbekiston 2:0 (o‘rtoqlik o‘yini)
3. 1997 O‘zbekiston - BAA 2:3 (JCh-1998 saralashi)
4. 1997 BAA - O‘zbekiston 0:0 (JCh-1998 saralashi)
5. 1999 BAA - O‘zbekiston 0:1 (OK-2000 saralashi)
6. 2001 BAA - O‘zbekiston 4:1 (JCh-2002 saralashi)
7. 2001 O‘zbekiston - BAA 0:1 (JCh-2002 saralashi)
8. 2003 BAA - O‘zbekiston 2:2 (o‘rtoqlik o‘yini)
9. 2009 BAA - O‘zbekiston 0:1 (OK-2011 saralashi)
10. 2010 O‘zbekiston - BAA 0:1 (OK-2011 saralashi)
11. 2012 BAA - O‘zbekiston 1:0 (o‘rtoqlik o‘yini)
12. 2012 BAA - O‘zbekiston 2:2 (o‘rtoqlik o‘yini)
13. 2013 BAA - O‘zbekiston 2:1 (OK-2015 saralashi)
14. 2014 O‘zbekiston - BAA 1:1 (OK-2015 saralashi)
15. 2014 BAA - O‘zbekiston 0:4 (o‘rtoqlik o‘yini)

BAA terma jamoasiga qarshi eng ko‘p marta maydonga tushgan futbolchilarimiz uch nafar - Server Jyeparov, Timur Kapadze va Nikolay  Shirshov - 7 marta.

BAA terma jamoasiga qarshi o‘yinlarda raqiblar darvozasini eng ko‘p ishg‘ol etgan futbolchilar - Server Jyeparov (3) va Nikolay Shirshov (2).

BAA terma jamoasiga qarshi eng ko‘p marta duch kelgan bosh murabbiylar ichida Mirjalol Qosimov yaqqol peshqadam. U 6 marta futbolchilarni bu raqibga qarshi maydonga olib tushgan (2 g‘alaba, 2 durang va 2 mag‘lubiyat, to‘plar nisbati 9:6). Bahodir Ibragimov va Vladimir Salkov 2 martadan BAAga ro‘baro‘ kelgan.

Bosh murabbiylarimiz ichida faqat Mirjalol Qosimov va Mahmud Rahimov BAAni mag‘lub etishga muvaffaq bo‘lgan.

BAA terma jamoasiga qarshi biz uchun eng ahamiyatli bo‘lgan g‘alabani 1999 yili qo‘lga kiritganmiz. O‘shanda Mahmud Rahimov shogirdlari Osiyo chempionati saralashining hal qiluvchi bahsida Maksim Shatskixning yagona goli evaziga raqibni mag‘lub etib, yagona yo‘llanmani ilib ketgan edi.

Eslatib o‘tamiz, bugungi o‘yin Al-Ayn shahridagi «Hazza bin Zayd» stadionida, soat 18:00da boshlanadi.

Mavzuga oid
Top