«O‘zbekoziqovqatzaxira» korxonalari shaxsiy yordamchi xo‘jaliklar mahsulotini xarid qiladi

Prezidentning 30.11.2017 yildagi PQ-3418-son  qarori bilan «O‘zbekoziqovqatzaxira» uyushmasi tashkilotlari tomonidan dehqon va shaxsiy yordamchi xo‘jaliklardan qishloq xo‘jaligi mahsulotlarini xarid qilish tartibi to‘g‘risidagi nizom tasdiqlandi. Bu haqda Norma.uz xabar bermoqda.

Ma'lumot uchun: shaxsiy yordamchi xo‘jalik - bu shaharcha, qishloq, ovullarda yashovchi fuqarolarga (meros qilib qoldiriladigan umrbod egalik qilish huquqi asosida uy-joy qurish uchun berilgan uchastkalarning bir qismida) tomorqada oila a'zolarining shaxsiy mehnati asosida oila ehtiyojlari uchun dehqonchilik va chorvachilik mahsulotlarini yetishtirish hamda oila ehtiyojidan ortiqchasini dehqon bozorlarida sotish bilan shug‘ullanadigan oilaviy xo‘jalik.

Qishloq xo‘jaligi mahsulotlari yetishtirish bilan shug‘ullanadigan shaxsiy yordamchi xo‘jaliklar tijorat bankida MB qayta moliyalashtirish stavkasidan oshmaydigan stavka bo‘yicha EKIHning 100 baravarigacha bo‘lgan miqdorda mikrokredit olishlari mumkin. Mikrokredit muddati, shuningdek imtiyozli davr mablag‘larning belgilangan maqsadlariga bog‘liq (batafsil o‘qing).

Nizom doirasida qishloq xo‘jaligi mahsulotlari deganda dehqon yoki shaxsiy yordamchi xo‘jaliklarda yetishtirilgan sabzavotlar, kartoshka, poliz mahsulotlari, mevalar, uzum, guruch, dukkaklilar, mol, qo‘y va parranda go‘shti tushuniladi.

Qishloq xo‘jaligi mahsulotlarini xarid qilish quyidagilar uning taraflari hisoblanadigan oldi-sotdi shartnomalari asosida amalga oshiriladi:

•  yetkazib beruvchi – dehqon yoki shaxsiy yordamchi xo‘jalik-qishloq xo‘jaligi mahsulotlarini yetishtiruvchi;
•  «O‘zbekoziqovqatzaxira» uyushmasi tarkibiga kiradigan qishloq xo‘jaligi mahsulotlarini tayyorlash va saqlash uchun g‘amlash hamda realizatsiya qilish bo‘yicha korxonalar. Uyushmaning rasmiy sayti ma'lumotlariga ko‘ra uning tizimiga butun respublika bo‘yicha 46 tashkilot kiradi.

Shartnoma bilan bir qatorda taraflar o‘rtasida tasdiqlangan shakl bo‘yicha xarid qilish dalolatnomasi rasmiylashtiriladi. Unda bitim tuzilgan joy, yetkazib beruvchining FIO, pasport ma'lumotlari va STIR, mahsulot nomi, uning hajmi, narxi va bitim summasi, shuningdek yetkazib beruvchi imzosi bilan pul olinganligining tasdiqlanganligi yoki uning plastik kartasi rekvizitlari (hisobvaraq raqami) aks ettiriladi.

Xarid qilingan qishloq xo‘jaligi mahsulotlari uchun hisob-kitob naqd pul bilan yoki plastik kartaga yoxud bankdagi omonat hisobvarag‘iga pul o‘tkazish bilan amalga oshiriladi.

Hujjat 1.12.2017 yildan kuchga kirdi.