Hokim bilan suhbat. Jizzax viloyatini istiqbolda nimalar kutmoqda?

KUN.UZ tahririyati ijodiy guruhi kelib tushgan murojaatlar asosida Jizzax viloyatiga safar uyushtirdi. Mazkur safar davomida aholini qiynab kelayotgan turli muammolar o‘rganildi, shu bilan birga, mazkur murojaatlar yuzasidan viloyat hokimi vazifasini vaqtincha bajaruvchi Ergash Saliyev bilan suhbatlashildi.

- O‘zbekiston mustaqillikka erishgach, turli sohalarda izchil islohotlar bo‘lib turgan. Ammo 2016 yilning sentabr oyidan boshlab mazkur islohotlar sifat jihatidan yangi bosqichga ko‘tarilganiga barchamiz guvoh bo‘lib turibmiz. Men uzoq yillardan buyon rahbarlik faoliyatida ishlab kelaman. Bu o‘z-o‘zidan insonda mazkur yo‘nalishda tajriba hosil qiladi va undan ish jarayonida keng foydalansiz. Ana shundan kelib chiqqan holda aytishim mumkinki, ijtimoiy sohani isloh qilish asosiy vazifalardan biri hisoblanadi, - dedi E.Saliyev.

O‘tgan yili amalga oshirilgan ishlarga nazar tashlaydigan bo‘lsak, muloqotlar jarayonida nogironligi bor, uy-joyga ehtiyojmandlarga yordam berildi, ularning uy olishlari uchun boshlang‘ich badallar to‘lab berildi. Shu bilan birga ularni ish bilan ta'minlash ishlari ham atroflicha bajarildi.

Viloyatda maktabgacha ta'lim tizimida ham faol chora-tadbirlar olib borilmoqda. Masalan, bugungi kunda viloyatda 22,3 foiz 5 yoshdan 7 yoshgacha bo‘lgan bolalar maktabgacha ta'lim muassasalariga qamrab olingan. Ammo ana shu muassasalarning ham o‘z muammolari yetarlicha: ayrimlari sovuq, ayrimlarida sport maydonchasi yo‘q, boshqalari esa eski binolarda joylashgan. Prezidentimiz vazifa etib berganlaridek, keyingi besh yil ichida mazkur tizimni rivojlangan mamlakatlar darajasiga yetkazishimiz kerak. Albatta, bu borada ham o‘z rejalarimiz bor. Bugun viloyatda 11 ta xususiy bog‘cha tashkil etildi. Sharoitlari juda yaxshi. Bu borada imtiyozlar ham yaxshi berilmoqda. Bu ko‘rsatkichni 195taga yetkazishni reja qilganmiz.

E.Saliyev Jizzax viloyatida sport yo‘nalishi bo‘yicha nimalar qilingani va rejada qanday ishlar borligi haqida ham to‘xtalib o‘tdi.

- O‘tgan yil jizzaxlik yosh sportchilardan 50 nafardan ortig‘i xalqaro turnirlar g‘oliblariga aylanishdi. O‘zbekiston sporti tarixida ilk marta jizzaxlik qiz martda o‘tadigan qishki paralimpiya o‘yinlarida ishtirok etadi. To‘g‘risini aytsam, Respublika Olimpiya qo‘mitasiga, Respublika boks federatsiyasiga ko‘p e'tiroz bildirganman. Negaki, ayrim sport musobaqalarida yutqizib qo‘yishyapti. Bizda, Jizzax viloyatida boks bo‘yicha 81 kg vaznda Jaloliddin O‘ktamov, degan sportchi bor. U ikkita muhim jangni muvaffaqiyat bilan yakunladi. U hozir homiylar yordamida uchinchi jangini o‘tkazish uchun Moskva shahriga jo‘nab ketdi. Lekin uni terma jamoa tarkibiga chaqirishmaydi.

- Jizzax viloyatida turizm imkoniyatlari 5 foizga ham ishlatilmayapti, - deydi E.Saliyev viloyatda turizmni rivojlantirish masalalariga to‘xtalib o‘tar ekan. - Misol uchun, viloyatga e'tibor beradigan bo‘lsak, u O‘zbekistonning qoq markazida joylashgan viloyatlardan biri. Men Jizzaxni kichik O‘zbekiston, deb bilaman. Chunki bu yerda tog‘ bor, ko‘l bor, o‘rmon ham, cho‘l ham bor. Turizm uchun imkoniyatlarimiz yetarli.

Yaqinda Qatarga delegatsiyamiz bordi. Men Forish va Zomindan maxsus lavhalar oldirib, disklarda berib yubordim. Maqsad u yerdagi boylarni viloyatimizga safar uyushtirishlariga qiziqtirish. Turizmning yo‘nalishlari ko‘p, ammo O‘zbekistonda sport turizmi degan yo‘nalish juda kam ishlatilyapti, unga ahamiyat sustroqdik.

Masalan, Zomin dengiz sathidan 2500 metr balandlikda joylashgan. Mashg‘ulot olib borayotgan sportchi uchun bu optimal sharoit hisoblanadi. Buning uchun chet elliklar va o‘zimizning Sport vazirligi bilan hamkorlikda u yerda baza tashkil etib, kerak bo‘lsa, mashhur sportchi va jamoalarni undan foydalanishlariga imkon yaratib berilsa, bu respublikaga valyuta tushumining oshishiga sabab bo‘ladi. Bu bazalardan mahalliy sportchilar ham ixtiyoriy foydalanishlari mumkin bo‘ladi.

Youtube`da ko‘rish