Jizzaxda avtobus va yuk mashinasi ishtirokida YTH sodir boʻldi. Jizzax viloyati YHXB hodisa yuzasidan rasmiy axborot berdi.
Maʼlum qilinishicha, YTH 11-sentabr kuni ertalab M-39 avtomobil yoʻlining Sharof Rashidov tumani hududidan oʻtgan qismida sodir boʻlgan. Buxoro viloyatida yashovchi 44 yoshli haydovchi Yutong avtobusini Toshkent-Samarqand yoʻnalishida boshqarib borayotib, yoʻlning belgilangan joyidan qayrilib harakatlanayotgan vaqtida qarama-qarshi yoʻnalishda kelayotgan yuk mashinasi bilan toʻqnashgan. Yuk mashinasi Qashqadaryo viloyatida yashovchi 43 yoshli haydovchi boshqaruvida boʻlgan.
YTH oqibatida halok boʻlganlar yoʻq. Avtobusda boʻlgan ayrim yoʻlovchilarga birinchi tibbiy yordam koʻrsatilgan.
