Jizzax viloyatida bir kunda 2 ta YTHda 5 kishi halok bo‘ldi. Bu haqda Kun.uz manbasi xabar berdi.
14-avgust kuni Paxtakor tumani Bog‘ishamol mahallasi hududida 2 ta Cobalt ishtirokida YTH sodir bo‘lgan. 1993-yilda tug‘ilgan haydovchi A.I. Cobalt mashinasini boshqarib ketayotib, quvib o‘tish qoidasini buzgan va qarama-qarshi yo‘nalishda kelayotgan Cobalt bilan to‘qnashgan. Ikkinchi mashina 36 yoshli X.U. boshqaruvida bo‘lgan.
Oqibatda bir haydovchi voqea joyida, ikkinchisi shifoxonada vafot etgan.
15-avgust kuni ertalab G‘allaorol tumanida yana bir ayanchli YTH sodir bo‘lgan. Buxoro viloyatida yashovchi 35 yoshli Sh.B. yuk mashinasini “Toshkent-Samarqand” yo‘nalishida boshqarib kelib, yo‘lning belgilanmagan joyidan qayrilib olayotganda Cobalt yo‘liga chiqib ketgan.
Oqibatda Cobalt haydovchisi va undagi bir yo‘lovchi voqea joyida, yana bir yo‘lovchi esa shifoxonada vafot etgan. Ular Surxondaryo viloyatining Oltinsoy tumanidan bo‘lgan.
Avvalroq Jizzax viloyatining Zomin tumanida Onix va Volkswagen to‘qnashuvida 2 kishi halok bo‘lgandi.
