Jizzax viloyatida qurilayotgan integratsiyalashgan atom elektr stansiyasi loyihasining umumiy qiymati 9,5 milliard dollarni tashkil etadi. Bu haqda 2-sentabr kuni Oʻzbekiston prezidentining matbuot xizmati xabar berdi. Avvalroq “Oʻzatom” agentligi rahbari Azim Ahmadxoʻjayev 9,5 mlrd dollar – loyihaning bazaviy maksimal qiymati ekanini aytgandi.
Ahmadxoʻjayev va boshqa masʼullar 2-sentabr kuni prezident Shavkat Mirziyoyevga integratsiyalashgan AES va unga yondosh shaharcha barpo etish boʻyicha qilinayotgan ishlarni taqdimot qildi.
“Atom energetikasini rivojlantirish mamlakatimiz – Oʻzbekiston energetik xavfsizligini mustahkamlash, barqaror bazaviy elektr generatsiyasini yaratish va energiya manbalarini diversifikatsiya qilishda strategik ahamiyatga ega.
Integratsiyalashgan atom elektr stansiyasi loyihasi joriy yil 4-iyundan qurilishning faol bosqichiga oʻtdi. Bugungi kunga qadar reaktor binosi uchun kotlovan qazish ishlari toʻliq yakunlanib, 1 million kub metrdan ortiq tuproq qazib olindi. Poydevor plitasining bir qismiga 916 kub metr beton quyildi. Qurilish-montaj bazasidagi 100 gektar maydonda yer ishlari bajarildi. Ayni paytda qurilish maydonida 450 nafar ishchi va mutaxassis, 100 dan ziyod maxsus texnika faoliyat yuritmoqda.
Loyihaning umumiy qiymati 9,5 milliard dollarni tashkil etadi. Jarayonda 3 mingga yaqin turdagi mahsulot va uskunalardan foydalaniladi.
Dastlabki hisob-kitoblarga koʻra, loyihada mahalliy mahsulotlar ulushi 21 foiz yoki 1,9 milliard dollarni tashkil etadi. Davlatimiz rahbari bu koʻrsatkich yetarli emasligini taʼkidladi.
Loyihada mahalliy mahsulotlar ulushini kamida 30 foizga yetkazish, qurilish-montaj ishlarining 65 foizini milliy korxonalar tomonidan bajarish hamda 7 ming nafar mahalliy ishchi va mutaxassisni jalb etish vazifasi qoʻyildi”, – deyiladi prezident matbuot xizmati xabarida.
Sanoat zonasi
Forish tumanida 200 gektar maydonda qurilish materiallariga ixtisoslashgan sanoat zonasini tashkil etish taklif qilindi. Unda kamida 100 ta qoʻshma korxonani joylashtirish va texnologiyalar transferi orqali 15 ta yoʻnalishda mahsulot ishlab chiqarishni mahalliylashtirish koʻzda tutilgan.
