Volkswagen xavfsizlik kamaridagi nosozlik sababli 400 mingdan ko‘proq mashinasini qaytarib olmoqda

Volkswagen nemis konserni Polo modelidagi 219 mingtadan ko‘proq, Seat (SeAT) markasidagi 191 mingta mashinasini xavfsizlik kamaridagi nosoz qulflar sababli qaytarib olmoqda. Bu haqda DPA axborot agentligi konsern vakiliga iqtibos keltirgan holda ma'lum qildi.  

Joriy yilda ishlab chiqarilgan Polo va Seat’ning Ibiza va Arona modellari qaytarib olinadi. Nosozlik sababli mashina harakatlanayotganda orqa chap o‘rindiqdagi xavfsizlik kamari yechilib ketishi mumkin. Ta'kidlanishicha, kompaniya bu nosozlikni bartaraf etish yo‘lini topgan.