Xonandalarni har bir to‘y uchun soliqqa tortish taklifi bildirildi

«Hokimning bir ish kuni» loyihasi doirasida Toshkent shahar hokimi o‘rinbosari Shuhrat Turdiqulov xonadonlarda bo‘lib, aholining ijtimoiy hayotiga molik bo‘lgan takliflarini ham o‘rganmoqda.

O‘zA muxbiri xabar berishicha, hokim o‘rinbosari xonandalar to‘yga chiqishlari haqida ham fikrlarini bildirib o‘tdi. Xususan, uning taklifiga ko‘ra, xonandalarning to‘yga chiqishlari «O‘zbekkonsert» Davlat muassasasi orqali amalga oshirilishi lozim.

«Shunda, «O‘zbekkonsert» Davlat muassasasi orqali xonandalar to‘yga aytilsa, ularning har bir chiqishlari soliqqa tortilishi, narxining nazoratda bo‘lishi osonlashadi. Hozirda xonandalar litsenziya olishda davlatga pul to‘laydilar xolos, bu ularning daromadiga nisbatan ancha kam. Hatto birrov to‘y narxidan ham arzon», degan Shuhrat Turdiqulov.