BMT Bosh assambleyasi Isroilning G‘azo sektoridagi harakatlarini qoraladi

BMT Bosh assambleyasi Isroilning G‘azo sektoridagi harakatlarini qoralovchi rezolyutsiyani qabul qildi. 

Hujjat 120 davlat tomonidan qo‘llab-quvvatlandi, sakkiztasi qarshi ovoz berdi, 45tasi - betaraf qoldi. Ta'kidlanishicha, qabul qilingan rezolyutsiya loyihasi AQSh BMT Xavfsizlik kengashida qabul qilinishini bloklab qo‘ygan hujjatga o‘xshashdir.

Rezolyutsiya Isroildan Falastin tinch aholisiga qarshi «o‘ta kuchli, noproporsional va tanlovsiz» kuchni qo‘llashdan tiyilishni talab qiladi.

Bundan tashqari, BMT Bosh assambleyasi mintaqada «darhol, mustahkam va to‘la rioya etiluvchi o‘t ochishni to‘xtatish rejimini ta'minlash uchun tezkor harakatlarga» chaqiradi.

Eslatib o‘tamiz, avvalroq Isroil armiyasi falastinlik 4 shaxsni o‘ldirgani, 618 kishi jarohat olgani xabar berilgandi.