AQSh va Meksika savdo haqidagi kelishuvga erishdi. Bu haqda AQSh prezidenti Donald Tramp ma'lum qildi.
Trampning aytishicha, yangi bitim tuzilgandan keyin AQSh, Kanada va Meksika o‘rtasida amal qilgan Shimoliy Amerika erkin savdo hududi (NAFTA) haqidagi kelishuv nomi o‘zgartiriladi.
“Biz Meksika bilan savdo bitimidan keyin NAFTA nomidan xalos bo‘lamiz”, deb aytgan Tramp.
Shuningdek, Kanada bosh vaziri Jastin Tryudo Tramp bilan NAFTA bo‘yicha muzokaralar o‘tkazgan.
“Bosh vazir AQSh prezidenti Tramp bilan NAFTA bo‘yicha sermazmun suhbat o‘tkazdi. Yetakchilar Meksika bilan erishilgan kelishuvni qutlashgan va muzokaralarni muvaffaqiyatli yakunlash maqsadida o‘z vakillarining joriy haftada uchrashishlarini sabrsizlik bilan kutishmoqda”, deb aytilgan Kanada tomoni bergan bayonotda.
Meksika va AQSh o‘rtasida erishilgan kelishuv ortida 27 avgust kuni AQSh fond indekslari rekordlarni yangilagan. Meksika pesosi dollar bilan birga rivojlanayotgan davlatlar valyutalari orasida eng yuqori sur'atlar bilan qimmatlashmoqda. Pesoning kursi 1,4 foizga, ya'ni bir dollarga 18,64 pesogacha oshgan.
AQSh, Meksika va Kanada o‘rtasidagi savdo ko‘lami yiliga 1 trln dollardan oshadi. Savdo munosabatlarining asosiy hajmi NAFTA ta'siri ostiga tushadi. Trampning fikricha, hozirgi ko‘rinishdagi NAFTA kelishuvi AQShga foydasizdir.
Ayni vaqtda NAFTA dunyodagi eng yirik mintaqaviy erkin savdo hududi hisoblanadi. U AQSh iqtisodiyotining turli sohalarida savdo to‘siqlarini kamaytirish maqsadida 1994 yilda tashkil etilgan.
