Ronalduning navbatdagi goli, irodali «Inter», «Roma»ning inqirozi - Italiyada tur voqealari

Italiya A Seriyasida 5-tur o‘yinlari o‘tkazildi. Unda e'tiborga molik bir qancha voqealar yuz berdi.

Tur o‘yinida «Napoli» safarda «Torino»ni yengdi

«Napoli» safarda «Torino» bilan bellashdi. O‘yin mehmonlarning to‘liq ustunligi ostida o‘tdi. 4-daqiqadayoq Insine hisobni ochishga muvaffaq bo‘ldi. Bu «Napoli»ga qo‘shimcha kuch bag‘ishlagan bo‘lsa, «Torino»ni biroz sarosimaga soldi. Yakunda neapolliklar 3:1 hisobida g‘alaba qozonib, 12 ochko bilan musobaqa jadvalida 2-o‘ringa chiqib olishdi.

O‘yindan so‘ng, «Napoli» bosh murabbiyi Karlo Anchelotti yangi taktikasi meva berayotganini aytdi.

«Insineni markazga yaqin joyda o‘ynata boshladim, bu esa samara berdi. Aynan u o‘yinning eng muhim futbolchisi bo‘ldi. 4-4-2 taktikasida Verdi va Kalexonni qanotlarda o‘ynatmoqdaman. Insine va Mertens hujumda to‘p tepmoqda. Natijada «Napoli» yanada ishonchli o‘yin namoyish qilyapti» - dedi Anchelotti.

Torino – Napoli 1:3 (0:2, 1:1)
23 sentabr, «Olimpiko di Torino»
Gollar: 0:1 – 4 Insine, 0:2 – 20 Verdi, 1:2 – 51, penalti Belotti, 1:3 – 59 Insine.
Torino – Sirigu, Itstso, Nkulu, Moretti, Ayna (Paridjini, 77), Bazelli (Edera, 87), Rinkon, Meyte (Soriano, 62), Berenger, Dzadza, Belotti.
Napoli – Ospina, Xyusay, Albiol, Kulibali, Luperto (Maksimovich, 74), Rog (Allan, 60), Hamshik, Kalexon, Insine, Verdi (Zelinski, 54), Mertens.
Ogohlantirishlar: Kulibali (23), Rinkon (31), Rog (37), Itstso (43), Albiol (52).

Ronalduning navbatdagi goli va «Yuventus»ning muammoli g‘alabasi

«Yuventus» safarda kamtarona «Frozinone» bilan bellashdi va 2:0 hisobida g‘alaba qozondi. Biroq, turinliklar so‘nggi 10 daqiqa ichida raqib qarshiligini sindira olishdi xolos. 81-daqiqada himoyachilar xatosidan foydalangan Ronaldu to‘pni darvozaga yo‘llab, hisobni ochdi. So‘nggi soniyalarda Bernardeski yakuniy hisobni o‘rnatdi. Bu g‘alabadan so‘ng, «Yuventus» 100% natija bilan jadvalda peshqadam bo‘lib turibdi.

O‘yindan keyin «Yuventus» bosh murabbiyi Massimiliano Allegri qiyin g‘alabaning sababini tushuntirdi.

«Biz «Frozinone»dan shunday o‘yinni kutgan edik. Avvalgi turda jamoa 5ta gol o‘tkazib, yutqazdi, biz esa chorshanba kuni «Valensiya»ga qarshi 70 daqiqa kamchilik bo‘lib o‘ynadik. Biz sabrli bo‘lishimiz kerak. Ko‘plab zarbalar, tezkor qarshi hujumlar va uzatmalardan so‘ng, niyatimizga yetdik», - dedi Massimiliano Allegri.

Frozinone – Yuventus 0:2 (0:0, 0:2)
Gollar: 0:1 – 81 Ronaldu, 0:2 – 90 Bernardeski.

«Inter»ning irodali va juda muhim g‘alabasi

«Inter» safarda «Sampdoriya» bilan bellashdi va 1:0 hisobida g‘alaba qozondi. Qizig‘i shundaki, bu o‘yinda «Inter»ning 2ta goli VAR tizimi orqali bekor qilindi. Shunga qaramay, «ko‘k-qoralar» kuchli iroda namoyish qilib, so‘nggi daqiqalarda g‘alaba keltiruvchi golni urishga muvaffaq bo‘lishdi. Marselo Brozovich jamoasiga juda muhim g‘alabani keltirdi. Bu natijadan so‘ng, «Inter» 7 ochko bilan 9-o‘ringa ko‘tarildi.

O‘yindan so‘ng, Brozovich tez orada haqiqiy «Inter»ning kuchi namoyon bo‘lishini aytdi.

«Bu juda qiyin o‘yin bo‘ldi, ammo biz g‘alaba qozona oldik. Biz baxtiyormiz va shu ruhda davom etmoqchimiz. Menimcha, mazkur hafta biz uchun mavsumda burilish yasaydi. Oldinda ko‘plab qiyin o‘yinlar bor, biroq, umid qilamanki endi hamma haqiqiy «Inter»ni ko‘radi U istalgan raqibni mag‘lub eta oladi», - dedi Brozovich.

Sampdoriya – Inter 0:1 (0:0, 0:1)
22 sentabr, «Luiji Ferraris» stadioni
Gol: 0:1 – 90+4 Brozovich.

«Latsio»ning yirik g‘alabasi va Immobile dubli

«Latsio» o‘z maydonida «Jyenoa»ni qabul qilib, 4:1 hisobidagi yirik g‘alabani qo‘lga kiritdi. Mezbonlar hujumchisi Chiro Immobile o‘yinda 2ta gol urishga muvaffaq bo‘ldi. Bu «Latsio»ning qatorasiga 3-g‘alabasi edi. Natijada, rimliklar 9 ochko jamg‘arib, musobaqa jadvalida 5-o‘ringa chiqib olishdi. Qayd qilish joizki, «Jyenoa»ning yagona goli Kshishtof Pyontek hisobiga yozildi. Hujumchi 5ta gol bilan to‘purarlar ro‘yxatini boshqarib kelmoqda.

Latsio – Jyenoa 4:1 (2:0, 2:1)
23 sentabr, «Stadio Olimpiko»
Gollar: 1:0 – 7 Kaysedo, 2:0 – 23 Immobile, 2:1 – 46 Pyontek, 3:1 – 53 Milinkovich-Savich, 4:1 – 89 Immobile.

«Roma»ning Bolonyadagi inqirozi

«Roma» safarda «Bolonya» bilan bellashib, kutilmaganda yaqqol autsayderlardan biriga yutqazdi. Mezbonlar nomdor raqib darvozasiga javobsiz 2ta to‘p yo‘lladilar. «Roma»ning loaqal 1ta gol urish uchun bo‘lgan barcha harakatlari zoye ketdi. Bu natijadan so‘ng, «Roma» 5 ochko bilan 14-o‘rinda bormoqda.

Bolonya – Roma 2:0 (1:0, 1:0)
23 sentabr, «Renato Dall'Ara»
Gollar: 1:0 – 36 Mattello, 2:0 – 59 Santander.  

«Milan» yana «qoqildi»

«Milan» barqaror o‘yini bilan bog‘liq muammolarni hal qila olmayapti. Jamoa o‘z maydonida «Atalanta»ni qabul qildi va ikki marta hisobda oldinda borishiga qaramay, g‘alabani qo‘ldan chiqardi. Qayd qilish joizki, «qizil-qoralar» so‘nggi soniyalarda gol o‘tkazib yuborib, tayyor g‘alabadan mahrum bo‘lishdi. Bu natijadan so‘ng, «Milan» 5 ochko bilan 13-o‘rinda bormoqda.

O‘yindan keyin, bosh murabbiy Jyennaro Gattuzo muvaffaqiyatsizlik sabablariga to‘xtalib o‘tdi.

«Bu jamoaning ikkita yuzi bor. Birinchi bo‘limni zo‘r o‘tkazdik, ammo so‘nggi yarim soatda muammolarga duch keldik. Bu 4ta turdan beri davom etyapti, biz 90 daqiqa davomida barqaror o‘ynay olmayapmiz. Biz ko‘proq ishlashimiz kerak» - dedi Gattuzo.

Milan – Atalanta 2:2 (1:0, 1:2)
Gollar: 1:0 – 2 Iguain, 1:1 – 54 Gomes, 2:1 – 61 Bonaventura, 2:2 – 90+4 Rigoni.

5-turning barcha natijalari
23 sentabr

Milan – Atalanta 2:2 (1:0, 1:2)
Gollar: 1:0 – 2 Iguain, 1:1 – 54 Gomes, 2:1 – 61 Bonaventura, 2:2 – 90+4 Rigoni.

Frozinone – Yuventus 0:2 (0:0, 0:2)
Gollar: 0:1 – 81 Ronaldu, 0:2 – 90 Bernardeski.

Torino – Napoli 1:3 (0:2, 1:1)
Gollar: 0:1 – 4 Insine, 0:2 – 20 Verdi, 1:2 – 51, penalti Belotti, 1:3 – 59 Insine.

Latsio – Jyenoa 4:1 (2:0, 2:1)
Gollar: 1:0 – 7 Kaysedo, 2:0 – 23 Immobile, 2:1 – 46 Pentek, 3:1 – 53 Milinkovich-Savich, 4:1 – 89 Immobile.

Kevo – Udineze 0:2 (0:0, 0:2)
Gollar: 0:1 – 76 de Paul, 0:2 – 90 Lazanya.

Bolonya – Roma 2:0 (1:0, 1:0)
Gollar: 1:0 – 36 Mattello, 2:0 – 59 Santander.

22 sentabr
Parma – Kalyari 2:0 (1:0, 1:0)
Gollar: 1:0 – 20 Ingleze, 2:0 – 47 Jyervino.

Fiorentina – SPAL 3:0 (2:0, 1:0)
Gollar: 1:0 – 18 Pyatsa, 2:0 – 28 Milenkovich, 3:0 – 56 Keza.

Sampdoriya – Inter 0:1 (0:0, 0:1)
Gol: 0:1 – 90+4 Brozovich.

21 sentabr
Sassuolo – Empoli 3:1 (1:1, 2:0)
Gollar: 0:1 – 1 Kaputo, 1:1 – 13 Boateng, 2:1 – 57 Ferrari, 3:1 – 85 Di Franchesko.

5-turdan so‘ng, musobaqa jadvali

To‘purarlar ro‘yxati:

5 - Kshishtof Pyontek (Jyenoa)

4 - Rodrigo De Paul (Udineze, 1), Lorentso Insine (Napoli), Gregore Defrel (Sampdoriya)

Raqibi yuziga tupurgan Duglas Kosta jazosini oldi

«Yuventus» yarimhimoyachisi Duglas Kosta A Seriya intizom qo‘mitasi tomonidan 4ta o‘yinga diskvalifikatsiya qilindi, deb xabar beradi Football Italia.

Futbolchi 4-turdan o‘rin olgan «Sassuolo»ga (2:1) qarshi bahsda raqib himoyachisi Federiko Di Francheskoni tirsagi bilan urib, unga boshi bilan yengil zarba bergan va sariq karta olgan edi. Biroz o‘tgach, u Federikoning yuziga tufladi va bosh hakam tomonidan maydondan chetlatildi. Endi Kosta «Frozinone», «Bolonya», «Napoli» va «Udineze»ga qarshi o‘yinlarni o‘tkazib yuboradi.

Hafta iqtibosi -  «Messi va Ronaldu Italiyada 50ta gol urolmaydi»

«Frozinone» hujumchisi Emil Hadlvredsson hujumchilar Lionel Messi va Krishtianu Ronalduning Italiyada qanday sermahsullikni namoyish qilishi mumkinligi haqida fikr yuritdi.

«Italiyada gol urish juda mushkul. Agar Messi va Ronaldu Italiyaga kelsa, xuddi Ispaniyadagi kabi 50ta gol urolmaydi. Chunki Italiya klublari yaxshiroq himoyalanishadi».

Hafta raqami - 10 million

Krishtianu Ronalduning «Yuventus»ga transferi klubning ijtimoiy tarmoqlardagi muxlislari sonini 10 millionga oshirdi, deb xabar beradi Calciomercato. 33 yoshli portugaliyalikning kelishidan so‘ng, «byankoneri»ning Facebook, Instagram, Twitter va YouTube ijtimoiy tarmoqlardagi o‘quvchilarining umumiy soni 49,7 dan 59,5 millionga yetgan.

Hafta qahramoni - Kshishtof Pyontek (Jyenoa)

«Jyenoa» hujumchisi Kshishtof Pyontek «Latsio»ga (1:4) qarshi o‘yinda raqib darvozasini ishg‘ol etdi. Natijada, polshalik futbolchi dastlabki 4ta turda 5ta gol urishga muvaffaq bo‘ldi va u «Milan»ning sobiq hujumchisi Andrey Shevchenko tomonidan 1999 yilda o‘rnatilgan rekordni takrorladi.

23 yoshli Pyontek yozda «Krakoviya» klubidan «Jyenoa»ga 4,5 million yevro evaziga o‘tgan edi.