БМТнинг Инсон ҳуқуқлари бўйича кенгашининг Женевада ўтган 39-сессиясида 2011 йил бошидан бери Мьянманинг Ракхайн штатида мусулмон аҳолига қарши содир этилган жиноятлар исботларини йиғиш бўйича мустақил механизм яратилиши ҳақида резолюция қабул қилинди.
Ҳужжат бу штатдаги воқеалар халқаро терговини ўтказиш бўйича материалларни тайёрлашни кўзда тутади. Резолюциянинг қабул қилинишига Европа Иттифоқи ва Ислом конференцияси ташкилоти ташаббус билдирган.
Мьянмадаги воқеалар бўйича докладда таъкидланишича, мамлакат қуролли кучлари бош штаби бошлиғи Мин Аун Хлайн ва бошқа юқори мансабдор ҳарбийлар Ракхайнда роҳингя мусулмонларига қарши геноцид содир этишган. Доклад муаллифлари уларни Халқаро жиноят судига топширишга чақиришмоқда.
1970-йиллар бошидан Мьянмадаги роҳингя мусулмонлари мунтазам равишда ҳужумлар ва этник тозалашларга учраб келадилар. Уларга қарши ҳужумлар 2017 йил 25 августидан кучайиб, “қуролланган жангариларга қарши кураш” важи остида олиб борилмоқда. Мьянмалик мусулмонларнинг 80 фоизи қўшни давлатларда бошпана топишга мажбур бўлган.
